Стала вядома, чаму пераможца беларускага адбору «Міс Сусвет» не едзе на конкурс. Яна знайшлася ў СІЗА
Хутчэй за ўсё, прычыны яе затрымання не палітычныя. Па словах сяброў, мадэль вінавацяць у махлярстве і сутэнёрстве.
Сёння ў Мексіцы адбудзецца фінал аднаго самых прэстыжных у свеце конкурсаў прыгажосці — «Міс Сусвет 2024». Беларусь у ім удзельнічае ўпершыню.
«Міс Беларусь 2023» Элеанора Качалоўская ўжо больш за два тыдні тусіць у Мехіка. Яна распавядае пра складанае жыццё мадэлі: нават на сняданак трэба прыходзіць у поўнай баявой гатоўнасці: з укладкай, макіяжам ды ў чарговай раскошнай сукенцы… А яшчэ ж увесь дзень трэба бегаць на абцасах ды пасміхацца ў аб’ектывы камер.
Наўрад ці іншая беларуская мадэль, Карына Кісялёва, можа паспачуваць Элеаноры ад усяго сэрца. Бо дзяўчына замест мексіканскай кухні цяпер вымушана знаёміцца з зусім іншай (і значна менш вытанчанай) ежай — турэмнай баландай. А як вядома, кухары ў беларускіх СІЗА зорак Мішлена не маюць.
Вось так па рознаму склаліся лёсы двух прыгожых беларусак, якія марылі пра конкурс «Міс Сусвет». Але як жа так атрымалася?
Гэта гісторыя магла б легчы ў аснову захапляльнага дэтэктыву — напрыклад, «Зніклая. Беларуская версія».
Дык вось, першая дзея: сёлета ў Беларусі выбіралі прыгажуню, якая першай будзе прадстаўляць краіну на конкурсе «Міс Сусвет». Карону і тытул атрымала 27-гадовая Карына Кісялёва.
Прыгажуня не хавала свайго шчасця: 28 верасня 2024 года дзяўчына не без гонару напісала, што стане першаадкрывальніцай «Міс Сусвет» для Беларусі. Але той допіс раптоўна знік з інстаграма. Карына пакінула толькі фота, зробленае перад пачаткам фіналу. Яна піша ў сацыяльных сетках «I’m tired» («Я стамілася»).
Знік і інстаграм-акаўнт missuniverse_belarus, дзе публікаваліся здымкі з конкурсу прыгажосці. А ў хуткім часе знікла і сама Карына.
На сцэне з’явілася новая гераіня, ужо добра вядомая гледачам. Элеанора Качалоўская з піянерскім энтузіязмам завярнулася ў чырвона-зялёны сцяг і назвала сябе першай прадстаўніцай Беларусі на конкурсе «Міс Сусвет».
Тым часам сябры Карыны пачалі панікаваць — звязацца з ёй не атрымлівалася. Тэлефон прыгажуні адключаны, у сацыяльных сетках яна не з’яўлялася больш за месяц.
Дык што здарылася? Казка наадварот: прынцэса ператварылася ў Папялушку.
Інсайдары распавялі «Нашай Ніве», што дзяўчына трапіла за краты. Суразмоўца, знаёмы з сітуацыяй, сцвярджае, што конкурс «Міс Сусвет Беларусь» сама Карына і арганізавала. Ён кажа, быццам дзяўчына набыла ў арганізатараў сусветнага конкурсу ліцэнзію на ўдзел для Беларусі і правяла конкурс прыгажосці, у якім імя пераможцы было вядома ад самага пачатку. Яе імя.
Ускосна гэта пацвярджаюць некаторыя факты. Па-першае, гэта невялікая колькасць удзельніц конкурсу. На фота з дабрачыннай акцыі ў Чэрвеньскім сацыяльным пансіянаце «Свет дабрыні» відаць толькі сем дзяўчын. На фота з фіналу і таго менш — шэсць. Для параўнання: у фінале «Міс Беларусь 2023» удзельнічала 24 прыгажуні.
Па-другое, кастынг на «Міс Сусвет Беларусь» піярыў акаўнт у інстаграме, назва якога сугучная з назвай акаўнта самой Карыны. Дарэчы, той самы профіль рэкламаваў і нейкі не вельмі зразумелы кастынг «на міжнародныя конкурсы прыгажосці». Беларускам абяцалі «выключна топавыя конкурсы» і пісалі, што «гэта добрая магчымасць заявіць пра сябе».
І па-трэцяе, гэта фактычная адсутнасць інфармацыі пра ход конкурсу ў беларускіх СМІ — пра фінал напісаў толькі адзін рэгіянальны сайт.
Па інфармацыі інсайдараў, Карына пад следствам за махлярства (арт. 209), а таксама за сутэнёрства. Назва артыкула незразумелая — ці то ўцягванне ў прастытуцыю (арт. 171-1), ці то арганізацыя прастытуцыі (арт. 171)
На гэты момант Карына Кісялёва знаходзіцца ў СІЗА ў Калядзічах.
Беларуска ўпершыню паедзе на конкурс прыгажосці «Міс Сусвет». Але не тая, якая перамагла ў нацыянальным адборы
Міс Беларусь Элеанора Качалоўская хваліцца адпачынкам у акупаваным Крыме ФОТЫ
Аб'яўлены першы ў свеце конкурс прыгажосці сярод штучных мадэляў. Пераможца атрымае амаль столькі ж, колькі і «Міс Беларусь»
Галоўнае — каб у фільма быў хэпі-энд. БРСМ звадзіў «Міс Беларусь» на прэм'еру прапагандысцкай карціны
Цяпер чытаюць
Хрыста Грозеў: ад рамантыка-радыёаматара да чалавека, які выкрыў самыя змрочныя таямніцы ГРУ і ФСБ. Як яго вербавала спецслужба Люксембурга і як ён вымушаны хавацца цяпер
Каментары