Штучны інтэлект падключаць да распрацоўкі АІС «Нарматворчасць», якая будзе ўкараняцца ў 2025 годзе. Пра гэта паведаміла намесніца кіраўніка Адміністрацыі Вольга Чупрыс у эфіры тэлеканала «Першы інфармацыйны».
Паводле яе слоў, штучны інтэлект можа дапамагчы сістэматызаваць дакументы, а пры распрацоўцы новага акта вызначыць, ці не будзе ён дубляваць ужо прынятыя раней.
«Ён можа адказаць на пытанне, ці варта ўвогуле прымаць гэты акт у тым выглядзе, у якім мы плануем яго прыняць, бо многія пытанні ўжо вырашаны, — дадала намесніца кіраўніка Адміністрацыі. — Таму тут нам трэба прыдумаць алгарытмы і пытанні, якія мы будзем задаваць штучнаму інтэлекту, і далей з яго дапамогай спрасціць нашу нарматворчасць і павысіць якасць нашых нарматыўна-прававых актаў».
Вольга Чупрыс таксама паведаміла пра маштабную рэвізію заканадаўства ў краіне, якая была праведзена па даручэнні Аляксандра Лукашэнкі. Мэтай гэтай працы было выявіць супярэчнасці і няўзгодненасці ў нарматыўных актах і зрабіць прымяненне заканадаўства зручным.
Каментары