Назвалі 10 самых ціхіх гарадоў свету. Усе яны знаходзяцца ў Еўропе

Эксперты Avanti прааналізавалі рэйтынг 100 найлепшых турыстычных гарадоў свету (Top 100 City Destinations Index) кампаніі Euromonitor International за 2025 год. Са спісу выключылі напрамкі, закрытыя для свабоднага наведвання, а таксама пазіцыі, якія тычыліся цэлых рэгіёнаў, а не асобных гарадоў. Кожны горад ацэньвалі ў радыусе двух кіламетраў ад яго афіцыйнага цэнтральнага пункта ў OpenStreetMap або ад будынка мэрыі, калі такі пункт адсутнічаў.

Затым даследчыкі параўналі працягласць аўтамагістраляў і буйных дарог з працягласцю пешаходных вуліц. Перавагай лічылася меншая колькасць ажыўленых магістраляў і большая працягласць пешаходных зон. Акрамя таго, гарады з першай дзясяткі праверылі на наяўнасць «правіл захавання цішыні»: ці дзейнічаюць там устаноўленыя законам гадзіны цішыні, начная каменданцкая гадзіна, абмежаванні на начныя рэйсы ў галоўным аэрапорце або забарона на працу крам па нядзелях.

Павялічыць

Топ-10 самых ціхіх гарадоў свету (паводле версіі Avanti Travel Insurance):

• Венецыя (Італія) — больш за 170 км пешаходных зон і поўная адсутнасць аўтамабіляў у гістарычным цэнтры.
• Лісабон (Партугалія) — нізкая шчыльнасць буйных дарог і забарона на начныя авіярэйсы.
• Амстэрдам (Нідэрланды) — больш за 30 км вуліц без аўтамабіляў і спакойныя маршруты ўздоўж каналаў.
• Барселона (Іспанія).
• Брусель (Бельгія).
• Афіны (Грэцыя).
• Цюрых (Швейцарыя).
• Мілан (Італія).
• Фларэнцыя (Італія).
• Стакгольм (Швецыя).

Хоць у першай дзясятцы цалкам дамінуюць еўрапейскія гарады, экспертка ў сферы падарожжаў Сара Радрыгес таксама назвала свае ўлюбёныя спакойныя напрамкі на іншых кантынентах для тых, хто гатовы адправіцца далей. У яе спіс увайшлі Хаян (В'етнам), востраў Ламу (Кенія), штат Нью-Мексіка (ЗША), Параці (Бразілія) і Нэльсан (Новая Зеландыя).

Тройка лідараў

Лідаркай спісу стала Венецыя, дзе ў радыусе двух кіламетраў ад цэнтра аналітыкі налічылі ўсяго каля двух кіламетраў ажыўленых дарог. Дзякуючы больш чым 170 кіламетрам цалкам пешаходных вуліц, ціхія каналы, гістарычныя плошчы і звілістыя завулкі горада дазваляюць пазнаёміцца з венецыянскай архітэктурай і культурай без звыклага дарожнага шуму.

Паводле слоў Радрыгес, гэты горад ідэальна падыходзіць для тых, хто хоча адпачыць ад гулу аўтамабіляў, паколькі на большай яго частцы няма аўтамабільнага руху. А прагулкі на досвітку дазваляюць убачыць той спакойны бок Венецыі, які турысты звычайна не заўважаюць.

Другое месца займае Лісабон, які вылучаецца адной з самых нізкіх сярод удзельнікаў даследавання шчыльнасцяў ажыўленых дарог. Акрамя таго, у мясцовым аэрапорце дзейнічаюць абмежаванні на начныя рэйсы.

Сталіца Партугаліі прыцягвае архітэктурай, аздобленай традыцыйнай пліткай азулежу, гістарычнымі трамваямі, шырокімі краявідамі ракі Тэжу і шматлікімі зялёнымі зонамі. Усё гэта дазваляе лёгка сумясціць культурную праграму са спакойным адпачынкам.

Для гэтага Радрыгес рэкамендуе ўключыць у маршрут сады Фонду Галуста Гюльбенкяна, называючы іх выдатным месцам, дзе можна адпачыць і далучыцца да мастацтва.

Тройку лідараў замыкае Амстэрдам, дзе налічваецца больш за 30 кіламетраў вуліц без аўтамабіляў, а маршруты ўздоўж каналаў дазваляюць вывучаць горад у спакойным тэмпе.

Павялічыць

Акрамя знакамітых водных артэрый і музеяў, у розных раёнах сталіцы Нідэрландаў можна знайсці незалежныя крамы, утульныя кавярні і адчуць мясцовы каларыт у нязмушанай атмасферы.

Радрыгес раіць падарожнікам спачатку вывучыць асаблівасці розных раёнаў, перш чым выбіраць жыллё. Па-за межамі самага цэнтра можна знайсці значна больш ціхія і прыдатныя месцы для адпачынку пасля працяглых прагулак.

• 0
• 0
• 0
• 0
• 0
• 0
• 0
• 0