Хто такі Кіт Келаг, ад меркавання якога залежыць лёс міру ва Украіне

Кіт Келаг нарадзіўся 12 мая 1944 года на ваеннай авіябазе ў Дэйтане (штат Агаё) у сям'і ваеннага. Яго бацька служыў у Ваенна-паветраных сілах ЗША, таму сям'я часта пераязджала.

Пасля заканчэння школы ў Лонг-Біч (Каліфорнія) Келаг атрымаў ступень бакалаўра паліталогіі ва Універсітэце Санта-Клары ў 1966 годзе. Паралельна з вучобай малады чалавек прайшоў падрыхтоўку ў Корпусе падрыхтоўкі афіцэраў запасу (ROTC). Пазней, у 1976 годзе, Келаг атрымаў ступень магістра міжнародных адносін ва Універсітэце Канзаса.

Ваенная кар'ера

У 1967 годзе Келаг пачаў службу ў войску ЗША. Пасля праходжання базавай падрыхтоўкі і школы рэйнджараў ён быў прызначаны ў 101-ю паветрана-дэсантную дывізію і накіраваны ў В'етнам, дзе камандаваў разведвальным узводам.

У наступныя гады Келаг працягнуў службу як афіцэр сіл спецыяльных аперацый. Ён быў інструктарам падрыхтоўкі спецназа для арміі Камбоджы (1971-1972), удзельнічаў у аперацыях ЗША ў Грэнадзе (1983), Панаме (1989-1990) і ў Персідскім заліве («Бура ў пустыні», 1990-1991).

Пазней ён заняў пасаду камандуючага Камандаваннем сіл спецыяльных аперацый у Еўропе (SOCEUR), а ў 1996 годзе ўзначаліў 82-ю паветрана-дэсантную дывізію — адно з самых элітных і баяздольных злучэнняў арміі ЗША. Пад яго камандаваннем дывізія выконвала аперацыі ў Босніі і Косава, а таксама ўдзельнічала ў вучэннях НАТА ў Казахстане і Узбекістане.

Павялічыць

Пасля гэтага Келаг перайшоў на службу ў Міністэрства абароны ЗША, дзе заняў адну з ключавых пазіцый, звязаную з забеспячэннем працы сістэм сувязі і каардынацыяй ваенных аперацый на глабальным узроўні — дырэктара па камандаванні, кіраванні, камунікацыям і камп’ютарным тэхналогіям у Аб'яднаным камітэце начальнікаў штабоў.

У момант тэрактаў 11 верасня 2001 года, калі рэйс 77 кампаніі American Airlines урэзаўся ў заходняе крыло Пентагона, Келаг знаходзіўся на сваім пасту і ўзяў на сябе кіраўніцтва альтэрнатыўным камандным пунктам у комплексе Raven Rock Mountain (RRMC) — звышсакрэтным падземным бункеры, прызначаным для працы вышэйшага вайсковага кіраўніцтва.

Ад Oracle да Белага дома

Пасля выхаду ў адстаўку ў 2003 годзе Кіт Келаг пачаў кар'еру ў грамадскім сектары, далучыўшыся да буйной тэхналагічнай кампаніі Oracle, дзе ён працаваў дарадцам па пытаннях унутранай бяспекі.

Аднак ужо ў снежні таго ж года ён стаў галоўным аперацыйным дырэктарам Часовай кааліцыйнай адміністрацыі Ірака, створанай пасля звяржэння рэжыму Садама Хусэйна, фактычна кіраўніком (адміністратарам) гэтай краіны.

Пасля завяршэння місіі ў Іраку Келаг працягнуў працу ў прыватным сектары, займаючы кіруючыя пасады ў кампаніях, якія спецыялізуюцца на ваенных тэхналогіях і абаронных кантрактах.

У 2016 годзе Келаг далучыўся да перадвыбарнай кампаніі Дональда Трампа ў якасці дарадцы па знешняй палітыцы.

Пасля перамогі Трампа ён быў прызначаны выканаўчым сакратаром і кіраўніком апарата Савета нацыянальнай бяспекі ЗША. У красавіку 2018 года Келаг заняў пасаду дарадцы па нацыянальнай бяспецы віцэ-прэзідэнта Майка Пенса.

У 2019 годзе, калі Кангрэс ЗША распачаў працэс імпічменту прэзідэнту Дональду Трампу, Кіт Келаг заняў жорсткую пратрампаўскую пазіцыю і актыўна выступаў у яго абарону. Імпічмент быў ініцыяваны ў сувязі з абвінавачваннямі ў ціску на Украіну з мэтай атрымання кампрамату на сына Джо Байдэна Хантэра.

Павялічыць

Падчас слуханняў у Кангрэсе Келаг заявіў, што «не пачуў нічога дрэннага ці неналежнага» ў размове Трампа з Зяленскім, падчас якой ён прысутнічаў.

У перыяд прэзідэнцтва Джо Байдэна Келаг займаў пасаду сустаршыні кансерватыўнага аналітычнага Цэнтра амерыканскай бяспекі ў Інстытуце палітыкі «Амерыка перш за ўсё».

Спецыяльны пасланнік па пытаннях Украіны і Расіі

У сакавіку 2022 года пасля пачатку поўнамаштабнай вайны Расіі ва Украіне Келаг заклікаў да аказання падтрымкі Кіеву:

«Давайце дамо Украіне шанец перамагчы. <…> Кітайцы звернуць на гэта ўвагу. Паўночныя карэйцы звернуць на гэта ўвагу. Іранцы звернуць на гэта ўвагу. Я лічу, што ў вас ёсць шанец раз у жыцці перазагрузіць сусветную арэну».

Генерал некалькі разоў пабываў ва Украіне. Так у пачатку 2023 года ён наведаў Бучу, Адэсу і прыфрантавыя Харкаў і Ізюм.

У чэрвені 2024 года Келаг прапанаваў Трампу падрабязны мірны план па спыненні вайны Расіі ва Украіне.

27 лістапада 2024 года, пасля перавыбрання Дональда Трампа на пасаду прэзідэнта, Келаг быў прызначаны спецыяльным пасланнікам па пытаннях Украіны і Расіі.

У гэтай ролі ён адказвае за дыпламатычныя намаганні па ўрэгуляванні канфлікту паміж дзвюма краінамі, прапаноўваючы стратэгіі, накіраваныя на дасягненне міру і стабільнасці ў рэгіёне.

Па інфармацыі The Wall Street Journal, Трамп з самага пачатку паставіў перад Келагам задачу дамагчыся ўрэгулявання канфлікту за 100 дзён.

Келаг не прымаў удзел у перамовах паміж ЗША і Расіяй у Эр-Рыядзе. Сёння ён прыбыў з візітам ва Украіну.

Кіт Келаг жанаты, у яго трое дзяцей. Яго дачка Меган Мобс — кіраўнік дабрачыннай арганізацыі R.T. Weatherman Foundation і неаднаразова бывала ва Украіне.

• 11
• 3
• 0
• 0
• 0
• 1
• 0
• 1