Ці дазволіць Польшча Трампу прадаць Украіну?

Былы карэспандэнт газеты Rzeczpospolita ў Брусэлі і Вашынгтоне Енджэй Бялецкі ў сваёй калонцы ва ўплывовым польскім выданні звяртае ўвагу на першыя праявы змены замежнапалітычнай стратэгіі Польшчы, якая да гэтай пары грунтавалася на веры ў тое, што Амерыка будзе бараніць Вольны свет, у тым ліку Украіну. Але цяпер гэтая ўпэўненасць пад пытаннем.

Аўтар аналізуе інтэрв'ю міністра замежных спраў Польшчы Радаслава Сікорскага аднаму з самых уплывовых і папулярных амерыканскіх палітычных аналітыкаў, эксперту ў галіне міжнародных адносін Фарыду Закарыя.

«Кіраўнік польскай дыпламатыі пазбягае адкрытай канфрантацыі з камандай Трампа, але ён выразна дыстанцыюецца ад гэтага, часам не хаваючы іроніі на адрас Вашынгтона», — заўважае Бялецкі і прыводзіць некаторыя адказы Сікорскага.

Закарыя пытаецца, у чым заключаецца стратэгія Амерыкі, спасылаючыся на абвінавачванні Трампа, што вайну пачаў Зяленскі і што ён увогуле дыктатар.

Сікорскі адказвае: «Кожная новая адміністрацыя толькі вучыцца. Добра, што яна кансультуецца з саюзнікамі». У гэтых словах гучыць ускосны намёк, як і ў заяве Зяленскага, што Трамп даў сябе падмануць расійскай прапагандзе.

Гарантыі бяспекі ад Амерыкі аказаліся бескарыснымі ў мінулым. Чаму Украіна зараз павінна ў іх верыць?

Сікорскі нагадвае, што Украіна ўжо атрымала такія гарантыі па Будапешцкім мемарандуме 1994 года, калі адмовілася ад трэцяга па велічыні ядзернага арсенала. Аднак подпіс амерыканскага прэзідэнта аказаўся нічога не варты: калі Кіеў страціў Крым у 2014 годзе, Вашынгтон не адрэагаваў. Такім чынам, Сікорскі дае зразумець, што грунтавацца на абяцаннях Трампа — не найлепшы варыянт для Украіны.

Больш за тое: падчас размовы ён робіць параўнанне з Мюнхенскім пагадненнем 1938 года, паводле якога заходнія дэмакратыі прадалі Чэхаславакію Трэцяму Рэйху.

Аднак, па словах Сікорскага, цяпер гэтага не паўторыцца, бо, у адрозненне ад чэхаў і славакаў, украінцы будуць працягваць ваяваць. Яны не застануцца адны: Еўропа іх падтрымае.

Наколькі рэалістычны гэты план?

Польскі міністр лічыць, што з дапамогай еўрапейцаў украінцы пратрымаюцца як мінімум да канца года. Ён адзначае, што найлепшай гарантыяй з'яўляецца амаль мільённая, загартаваная ў баях армія, а таксама вайсковая прамысловасць, якая толькі ў гэтым годзе зможа вырабіць 4,5 мільёна беспілотнікаў.

Прыкметай поспеху ўкраінцаў з'яўляецца перш за ўсё вынік трох гадоў вайны. Паводле Сікорскага, поспехі Пуціна — піравыя, бо цаной соцень тысяч забітых і параненых яны прасоўваюцца на фронце тэмпамі слімака.

Па думку аўтара, бадай, самым выразным сігналам дыстанцыявання Польшчы ад пазіцыі ЗША з'яўляецца заява аб тым, што яна не мае намеру падпісваць амерыканскі праект дэкларацыі ААН, у якім Расія больш не называецца агрэсарам і вінаватай у вайне. Сікорскі сцвярджае: «Трэба называць рэчы сваімі імёнамі».

У лютым 2022 года Джо Байдэн хацеў эвакуяваць Уладзіміра Зяленскага з Кіева. Толькі рашучасць прэзідэнта Украіны дазволіла пазбегнуць катастрофы, і Украіна працягвае змагацца. Цяпер сітуацыя паўтараецца: Кіеў павінен абараняць сваю незалежнасць не з дапамогай, а насуперак Амерыцы.

«Сярод вядучых польскіх палітыкаў, занятых перадвыбарчай кампаніяй, толькі Сікорскі, здаецца, гэта разумее. І, прынамсі, адкрыта пра гэта гаворыць», — адзначае Бялецкі і цытуе словы главы знешнепалітычнага ведамства Польшчы: «Польшча не дазволіць Дональду Трампу прадаць Украіну. Нягледзячы ні на што, мы будзем падтрымліваць украінцаў».

• 68
• 1
• 2
• 1
• 1
• 1
• 0
• 1