Ci dazvolić Polšča Trampu pradać Ukrainu?

Były karespandent haziety Rzeczpospolita ŭ Bruseli i Vašynhtonie Jendžej Bialecki ŭ svajoj kałoncy va ŭpłyvovym polskim vydańni źviartaje ŭvahu na pieršyja prajavy źmieny zamiežnapalityčnaj stratehii Polščy, jakaja da hetaj pary hruntavałasia na viery ŭ toje, što Amieryka budzie baranić Volny śviet, u tym liku Ukrainu. Ale ciapier hetaja ŭpeŭnienaść pad pytańniem.

Aŭtar analizuje intervju ministra zamiežnych spraŭ Polščy Radasłava Sikorskaha adnamu z samych upłyvovych i papularnych amierykanskich palityčnych analitykaŭ, ekśpiertu ŭ halinie mižnarodnych adnosin Farydu Zakaryja.

«Kiraŭnik polskaj dypłamatyi paźbiahaje adkrytaj kanfrantacyi z kamandaj Trampa, ale jon vyrazna dystancyjujecca ad hetaha, časam nie chavajučy ironii na adras Vašynhtona», — zaŭvažaje Bialecki i pryvodzić niekatoryja adkazy Sikorskaha.

Zakaryja pytajecca, u čym zaklučajecca stratehija Amieryki, spasyłajučysia na abvinavačvańni Trampa, što vajnu pačaŭ Zialenski i što jon uvohule dyktatar.

Sikorski adkazvaje: «Kožnaja novaja administracyja tolki vučycca. Dobra, što jana kansultujecca z sajuźnikami». U hetych słovach hučyć uskosny namiok, jak i ŭ zajavie Zialenskaha, što Tramp daŭ siabie padmanuć rasijskaj prapahandzie.

Harantyi biaśpieki ad Amieryki akazalisia bieskarysnymi ŭ minułym. Čamu Ukraina zaraz pavinna ŭ ich vieryć?

Sikorski nahadvaje, što Ukraina ŭžo atrymała takija harantyi pa Budapiešckim miemarandumie 1994 hoda, kali admoviłasia ad treciaha pa vieličyni jadziernaha arsienała. Adnak podpis amierykanskaha prezidenta akazaŭsia ničoha nie varty: kali Kijeŭ straciŭ Krym u 2014 hodzie, Vašynhton nie adreahavaŭ. Takim čynam, Sikorski daje zrazumieć, što hruntavacca na abiacańniach Trampa — nie najlepšy varyjant dla Ukrainy.

Bolš za toje: padčas razmovy jon robić paraŭnańnie ź Miunchienskim pahadnieńniem 1938 hoda, pavodle jakoha zachodnija demakratyi pradali Čechasłavakiju Treciamu Rejchu.

Adnak, pa słovach Sikorskaha, ciapier hetaha nie paŭtorycca, bo, u adroźnieńnie ad čechaŭ i słavakaŭ, ukraincy buduć praciahvać vajavać. Jany nie zastanucca adny: Jeŭropa ich padtrymaje.

Nakolki realistyčny hety płan?

Polski ministr ličyć, što z dapamohaj jeŭrapiejcaŭ ukraincy pratrymajucca jak minimum da kanca hoda. Jon adznačaje, što najlepšaj harantyjaj źjaŭlajecca amal miljonnaja, zahartavanaja ŭ bajach armija, a taksama vajskovaja pramysłovaść, jakaja tolki ŭ hetym hodzie zmoža vyrabić 4,5 miljona bieśpiłotnikaŭ.

Prykmietaj pośpiechu ŭkraincaŭ źjaŭlajecca pierš za ŭsio vynik troch hadoŭ vajny. Pavodle Sikorskaha, pośpiechi Pucina — piravyja, bo canoj socień tysiač zabitych i paranienych jany prasoŭvajucca na froncie tempami ślimaka.

Pa dumku aŭtara, badaj, samym vyraznym sihnałam dystancyjavańnia Polščy ad pazicyi ZŠA źjaŭlajecca zajava ab tym, što jana nie maje namieru padpisvać amierykanski prajekt dekłaracyi AAN, u jakim Rasija bolš nie nazyvajecca ahresaram i vinavataj u vajnie. Sikorski śćviardžaje: «Treba nazyvać rečy svaimi imionami».

U lutym 2022 hoda Džo Bajden chacieŭ evakujavać Uładzimira Zialenskaha z Kijeva. Tolki rašučaść prezidenta Ukrainy dazvoliła paźbiehnuć katastrofy, i Ukraina praciahvaje zmahacca. Ciapier situacyja paŭtarajecca: Kijeŭ pavinien abaraniać svaju niezaležnaść nie z dapamohaj, a nasupierak Amierycy.

«Siarod viadučych polskich palitykaŭ, zaniatych pieradvybarčaj kampanijaj, tolki Sikorski, zdajecca, heta razumieje. I, prynamsi, adkryta pra heta havoryć», — adznačaje Bialecki i cytuje słovy hłavy źniešniepalityčnaha viedamstva Polščy: «Polšča nie dazvolić Donaldu Trampu pradać Ukrainu. Niahledziačy ni na što, my budziem padtrymlivać ukraincaŭ».

• 68
• 1
• 2
• 1
• 1
• 1
• 0
• 1