Эстонскі парламент разгледзіць законапраект, які дазваляе пры ўзнікненні пагроз ужываць сілу ў дачыненні да гандлёвых суднаў не толькі ў сваіх тэрытарыяльных водах.
У сераду, 9 красавіка, парламент Эстоніі (Рыйгікогу) разгледзіць законапраект, які дазваляе вайскоўцам краіны ўжываць сілу да гандлёвых суднаў у Балтыйскім моры, што ўяўляюць пагрозу нацыянальнай бяспецы, піша Dw.de.
Паводле праекта рэзалюцыі, ухваленай парламенцкім камітэтам па нацыянальнай абароне, армія краіны атрымае магчымасць ужываць сілу для абароны інфраструктуры, абаронных аб’ектаў, партоў, абсталявання або суднаў, што аказваюць жыццёва важныя паслугі. У крайнім выпадку эстонскія вайскоўцы змогуць патапіць судна, якое ўяўляе пагрозу.
Такія меры будуць прымяняцца толькі ў выпадку, калі прадухіліць пагрозу іншымі спосабамі немагчыма, і калі магчымыя страты ад дзеянняў судна большыя, чым ад яго патаплення. Напрыклад, карабель не будуць тапіць толькі з-за намеру пашкодзіць падводныя кабелі. Акрамя таго, экіпаж судна будзе загадзя папярэджаны пра дзеянні арміі Эстоніі і эвакуяваны.
«Гэта дасць нам магчымасць дзейнічаць не толькі ў тэрытарыяльных водах — г.зн. за 12 марскіх міляў, што адлічваюцца ад берага і выспаў, як у нас, так і ў кожнай краіны, — але і ў выключнай эканамічнай зоне. Да самай мяжы, дзе эканамічная зона Эстоніі судакранаецца з зонамі іншых краін», — заявіў старшыня камітэта нацыянальнай абароны Дзяржаўнага сходу Калев Стайчэску.
Каментары