Telegram заблакаваў найбуйнейшы чат беларусаў Беластока. Адбылася атака з расійскага нумару
У Telegram заблакаваны чат «Беласток | Беласток | Białystok» — найбуйнейшая онлайн-супольнасць беларусаў і ўкраінцаў Беластока.
Як паведамілі адміністрацыі чата выданню Most, прычынай блакіроўкі стала мэтанакіраваная атака з выкарыстаннем акаўнта, зарэгістраванага на расійскі нумар. Зламыснік размясціў у чаце нелегальны кантэнт, што і стала падставай для ўмяшання службы мадэрацыі Telegram.
Гаворка ідзе пра кантэнт «для дарослых». Ён быў апублікаваны а 00:53 17 красавіка.
Парушальніка аператыўна заблакіравалі, а кантэнт выдалілі на працягу паўгадзіны. Тым не менш нехта паспеў зрабіць скрыншот паведамлення і даслаць скаргу адміністрацыі Telegram. Адміністратары чата ўжо звярнуліся ў службу падтрымкі платформы і чакаюць аднаўлення працы ў бліжэйшы час. Да моманту блакіроўкі ў чаце было 7418 падпісчыкаў.
Чат «Беласток» быў створаны ў 2020 годзе і першапачаткова аб’ядноўваў беларусаў, якія пакінулі краіну пасля пратэстаў і рэпрэсій. З пачатку поўнамаштабнай вайны ва Украіне да супольнасці далучыліся і ўкраінскія бежанцы, што пераехалі ў Падляскае ваяводства.
Каментары
Яшчэ ёсць рызыка для акаўнтаў адміністратараў (часова?) зачыненага чата, а таксама для іншых чатаў, у якіх яны адміністратары. Алгарытмы тэлеграма па аўтаматычных банах не заўсёды прадказальныя і іх дзеянні амаль немагчыма аспрэчыць.