Уладзімір Пуцін на сустрэчы з расійскімі бізнэсоўцамі раптам вымавіў фразу, якую ведае, бадай, кожны беларус.
Пуцін даручыў расійскім бізнэсоўцам актыўней працаваць на міжнародных рынках. Ён паабяцаў, што Крэмль будзе іх у гэтым падтрымліваць. І даў адну параду.
«Расійскія ўлады будуць актыўна падтрымліваць айчынны бізнэс за мяжой. Трэба настойліва гэта рабіць, трэба даўбіць, даўбіць, даўбіць», — сказаў Пуцін.
Ён міжволі працытаваў фразу, якую ведае, бадай што, кожны беларус. Падчас перадвыбарчай кампаніі 2020 года яе неаднаразова паўтарала на мітынгах Марыя Калеснікава. На адной з акцый у падтрымку Святланы Ціханоўскай яна звярнулася да сілавікоў з заклікам перайсці на бок народа. Тады яна ўпершыню і прамовіла фразу, што стала адным з сімвалаў пратэстаў.
«Сапраўдная сіла і ўлада — у руках народа! Нам не патрэбныя лідары, нам не патрэбныя супермэны, не патрэбныя новыя правадыры, нам патрэбныя мы самі і нашае жаданне і ўпартасць выходзіць, стаяць, назіраць, выказвацца, даўбіць, даўбіць і даўбіць гэтую ўладу!» — сказала Марыя Калеснікава.
Гэта яна паўтарыла і ў відэазвароце, які запісала на выпадак свайго затрымання.
«Вы ведаеце, што мы будзем рабіць — мы будзем даўбіць, даўбіць, даўбіць гэтую ўладу ўсімі законнымі сродкамі… Яна ператварылася ў паліцэйскую дзяржаву. Ці гэта нармальна?» — звярнулася да беларусаў Калеснікава. У верасні 2021 года Марыю асудзілі да 11 гадоў калоніі. Яна два гады знаходзілася ў поўнай ізаляцыі.
Журналістка і медыяменеджарка Яўгенія Сугак, якая працавала спічрайтэркай у штабе Бабарыкі, распавядала «Нашай Ніве», як нарадзілася знакамітая цытата:
«Калі я напісала для Машы «даўбіць-даўбіць-даўбіць» у тэксце, і першы раз яна гэта не прачытала, я падумала — окей, значыць ёй так камфортна. Але ў наступны раз яна чамусьці перадумала, і ў яе гэтая фраза атрымлівалася супермоцна».
Цяпер чытаюць
Валанцёр «Вясны» Чапюк расказаў, як яго затрымаў ГУБАЗіК адразу на выхадзе з калоніі і як дапытвалі пра Міколу Дзядка2
Каментары
(жартую)