Нечаканы бенефіцыяр рэпрэсій і масавай эміграцыі беларусаў — выручка гэтага расійскага бізнэсу ў Мінску вырасла на 4000%

Манапаліст у сферы абвестак аб працы ў Беларусі — сайт rabota.by, які належыць ТАА «Уся работа».

Па дынаміцы выручкі гэтай кампаніі можна ўбачыць, наколькі ўсё цяпер складана для наймальнікаў. 

Выручка кампаніі выбухова расце пачынаючы з 2021 года. На сёння невялікае прадпрыемства з нізкім сабекоштам і просценькай бізнэс-мадэллю генеруе і выручку, і чысты прыбытак на ўзроўні дарослай беларускай ІТ-кампаніі. 

Рэнтабельнасць rabota.by — фантастычныя 78%, чысты прыбытак за 2025 год — 16,5 мільёна беларускіх рублёў. Асноўныя грошы прыходзяць ад тарыфікавання працадаўцаў, якія размяшчаюць абвесткі аб вакансіях. 

Прыбыткі кампаніі стабільна выводзяцца дывідэндамі. Каму? Расіянам. 

Сама кампанія «Уся работа» з'явілася ў ліпені 2020‑га як вынік зліцця rabota.tut.by і hh.by — філіяла расійскага Хэдхантара ў Беларусі. «Тутбай медыя» належала 40%, яшчэ 10% — беларускаму менеджару Аляксандру Чакану, астатнія 50% — рускім. 

Пасля разгрому Tut.by беларускае ТАА «Уся работа» стала на 100% належаць расійскай юрыдычнай асобе «Хэдхантар». 

Расійскі «Хэдхантар» гэта публічная расійская кампанія, структура яе валодання невядомая — там шмат акцыянераў, а заснавальнікам-расіянам (Леван Назараў, Адысей Гаўрылаў і іншыя), як лічыцца, належаць вялікія мінарытарныя долі. Каля паловы акцый кампаніі знаходзяцца ў свабодным абарачэнні на расійскай біржы і належаць расійскім інвестфондам і рознічным інвестарам. 

Павялічыць

Масавы адток людзей з Беларусі пачаўся з канца 2020 года і працягваецца дагэтуль. 

Частка працаздольнага насельніцтва пакідае краіну з эканамічных прычын, таму што ў Беларусі самыя нізкія ў рэгіёне заробкі. 

Іншая частка працаздольнага насельніца ратуецца за мяжой ад рэпрэсій. 

І нават тыя высокакваліфікаваныя работнікі, якія маюць добрыя заробкі і не адчуваюць рызыкі пераследу, усё роўна часта вымушаны з'язджаць па карпаратыўных прычынах — замежныя контрагенты беларускіх тэхналагічных фірм патрабуюць пераводу юрыдычных асоб і штатаў у іншыя юрысдыкцыі з меркаванняў маралі або банкаўскіх стандартаў. 

Такім чынам, з краіны вымываецца як нізкакваліфікаваная, так і высокакваліфікаваная працоўная сіла.

Замяніць нізкакваліфікаваных работнікаў улады спрабуюць праз прыцягванне эканамічных мігрантаў з адсталых рэгіёнаў Азіі: Бангладэш, Пакістана, Індыі.

Працадаўцы, сутыкнуўшыся з тым, што размяшчэнне вакансіі на ўласным сайце ўжо не дае ніякага выніку, вымушаныя звяртацца да пасярэднікаў і шукаць работнікаў на профільных рэсурсах.

• 2
• 0
• 3
• 8
• 1
• 1
• 8
• 0