Беларуска перавезла ў Егіпет 84‑гадовую маці: Нават ціск як у касманаўткі стаў
Угаварыць бацькоў сталага ўзросту на пераезд — задача складаная. Але ж Наталля Цыбульская падзялілася ў сацсеткай зусім іншай гісторыяй. Яе маці была шчаслівая ў 84 гады пераехаць у Егіпет.
Небанальную гісторыю свайго жыцця Наталля распавяла ў каментарах, калі пабачыла пытанне, ці пераязджаў нехта ў Егіпет па ўласнай волі.
Шмат хто адразу падумаў, што беларуска, імаверна, выйшла замуж за егіпцяніна — і таму шмат гадоў жыве на радзіме мужа. Але не: Наталля не мае мужа. А з’ехаць у Беларусі ў свой час вырашыла праз змену рэлігіі. Ва ўніверсітэце яна вывучала рэлігіязнаўства — і шмат даведалася пра іслам. Дваццаць шэсць гадоў таму яна вырашыла перайсці ў гэтую рэлігію.
Наталля піша, што суайчыннікі не ўспрымалі яе як мусульманку і ўвесь час гнабілі: «Нават цяпер, калі трэба прыляцець па справах, праблемы пачынаюцца ўжо ў аэрапорце».
Гэта здзіўляе Наталлю. Маўляў, у Беларусі 80% людзей — атэісты. Здавалася б, чаму іх хвалюе, якой рэлігіі прытрымліваюцца іншыя суайчыннікі. Але рэчаіснасць была непрыемнай.
Два гады беларуска пражыла ў Дубаі. Там ёй не вельмі спадабаўся клімат — кажа, што пакутавала ад спякоты. А пасля згадала сваю школьную мару. Яшчэ ў пятым класе, калі праходзілі гісторыю Старажытнага Егіпта, Наталля загарэлася ідэяй жыць там. Калі ўпершыню прыехала ў Егіпет, адразу зразумела: гэта яе краіна.
Цяпер жанчына працуе настаўніцай фізкультуры ў школе, трэнеркай у трэнажорцы і рэабілітолагам, а таксама атрымоўвае прыбытак ад здачы ўласнай нерухомасці ў арэнду.
Некалькі гадоў таму Наталля перавезла да сябе ў Егіпет сваю 84‑гадовую маці. Тая ўсю маладосць актыўна вандравала і да 55 гадоў кожны год ездзіла на мора. Няблізкі пералёт да дачкі маці перанесла даволі лёгка і потым яшчэ не аднойчы лётала ў Беларусь, калі трэба было вырашаць нейкія пытанні.
Беларуска дзеліцца ўласным досведам. Распавядае, што ведае: людзям сталага ўзросту вельмі важна, каб у эміграцыі была звыклая ежа. Але ёй і ў гэтым пашанцавала.
Яшчэ тады, калі маці і дачка жылі ў розных краінах, Наталля, прыязджаючы на радзіму, гатавала традыцыйныя егіпецкія стравы. Маці яны падабаліся. А ў самім Егіпце яна ацаніла багацце садавіны і гародніны, а таксама мясцовыя дэсерты.
Пры гэтым, здароўе маці ў новай краіне толькі палепшылася: «У Беларусі ў яе ціск зашкальваў, а ў Егіпце 130 на 80 было. Яна ветэран працы, 65 гадоў бесперапыннага стажу. У 80 гадоў толькі перастала працаваць».
На пытанні пра спякоту Наталля тлумачыць, што яе маці наадварот было камфортна ў больш цёплым клімаце. Рэч у тым, што з узростам пагаршаецца тэрмарэгуляцыя і людзі пачынаюць мерзнуць: «Яна ўлетку не хацела кандыцыянер уключаць, ёй добра было без яго».
Больш за ўсё маці Наталлі падабалася, як егіпцяне ставяцца да людзей сталага ўзросту: «Суседзі прыходзілі да яе з рознымі прысмакамі. Размаўлялі праз мяне, я перакладала».
Ад настальгіі ж не пакутавала. У апошні свой прыезд у Беларусь, калі трэба было разабрацца з пенсіяй, сталая жанчына не магла дачакацца вяртання ў Егіпет.
Яна ж загадала дачцэ і пахаваць яе ў Егіпце, калі прыйдзе час. Жанчына памерла за 4 дні да свайго 88 дня нараджэння, пахавалі яе на хрысціянскіх могілках.
Гісторыя Наталлі набрала амаль 7 тысяч лайкаў за суткі. Людзі дзякуюць за тое, што яна падзялілася досведам — бо шмат хто з мігрантаў думае пра тое, як забраць бацькоў да сябе, але баяцца гэтага.
Радуюцца і таму, што маці Наталлі паспела пажыць у іншай краіне і пабачыць яе прыгажосць.
Цяпер чытаюць
Зяленскі назваў, якія рэтранслятары на мяжы і беларускія прадпрыемствы хвалююць Украіну36
Каментары