У іспанскую вёску прывезлі дзевяць зуброў. Імі паспрабуюць вырашыць сур'ёзную праблему
У невялікай іспанскай вёсцы Эль-Рэкуэнка, што ў правінцыі Гвадалахара, пачаўся эксперыментальны праект, у межах якога на агароджаную тэрыторыю выпусцілі дзевяць еўрапейскіх зуброў — пяць самак і чатырох самцоў. Навукоўцы хочуць высветліць, ці змогуць гэтыя жывёлы знізіць рызыку лясных пажараў і дапамагчы аднаўленню экасістэм.
За зубрамі назіраюць з дапамогай GPS-прылад. Даследчыкі вывучаюць іх харчаванне, узровень стрэсу і ўплыў на расліннасць.
Ідэя праекта ў тым, што зубры будуць аб'ядаць траву, кустоўе і маладую драўніну, якія ў спякотнае надвор'е ператвараюцца ў сухастой і могуць стаць крыніцай пажараў. Дарослы зубр здольны з'ядаць да 60 кілаграмаў расліннасці за дзень.
Прыхільнікі праекта называюць зуброў «інжынерамі ландшафту», бо яны не толькі ядуць расліны, але і вытаптваюць густыя зараснікі, спрыяючы большай разнастайнасці прыроднага асяроддзя.
Аднак не ўсе падтрымліваюць гэту ініцыятыву. Крытыкі сцвярджаюць, што мясцовыя віды дзікіх і свойскіх траваедных жывёл могуць выконваць такую ж ролю. Таксама яны сумняваюцца, што зубры, якія традыцыйна жывуць у больш халодных рэгіёнах Еўропы, добра адаптуюцца да гарачага і сухога клімату Іспаніі.
Спрэчкі выклікае і пытанне гістарычнай прысутнасці зуброў на Пірэнейскім паўвостраве. Некаторыя даследчыкі спасылаюцца на старажытныя наскальныя малюнкі, але іх апаненты лічаць, што там намаляваны ўжо вымерлы стэпавы бізон, а не сучасны еўрапейскі зубр.
На працягу наступных двух гадоў навукоўцы будуць ацэньваць вынікі эксперыменту. Калі зубры змогуць скараціць колькасць кустоўя і паспяхова прыжывуцца, гэта стане важкім аргументам на карысць пашырэння такіх праектаў.
Каментары
Так а чаму ж, калі яны могуць выконваць такую ж ролю, яны яе не выконваюць?
Бабры за 2-3 пакалення набудуюць ім экасістэм.
Падаецца, у Сарагосе быў паспяховы эксперымент.