На днях у Эканамічным судзе Мінска пройдзе цікавае пасяджэнне. ТАА «Трайпл» падало пазоў да расійскага бізнесмена і былога ўдзельніка таварыства Іосіфа Аксенцьева.
Ідзе гаворка аб устанаўленні факту неадпаведнасці дамовы куплі-продажу долі ва ўстаўным фондзе «Трайпла» ў памеры 16,75% у 2015 годзе. Калі суд задаволіць пазоў, справа можа атрымаць даволі нечаканы паварот, піша Office Life.
10 гадоў таму доля ў памеры 33,5% у «Трайпле» перайшла ад Уладзіміра Япрынцава да двух расіян — Аксенцьева і Міхаіла Маміашвілі. Кожны атрымаў па 16,75%. Перад гэтым Япрынцаў, спрабуючы закрыць даўгі сына Казбека, прапаноўваў яе купіць свайму шматгадоваму партнёру па «Трайпле» Юрыю Чыжу, але той не стаў гэтага рабіць.
У 2019 годзе разглядаўся пазоў Уладзіміра Япрынцава да Іосіфа Аксенцьева аб прызнанні несапраўдным дагавора куплі-продажу яго долі ў «Трайпле». Япрынцаў казаў, што падпісваў «абавязацельства па закладзе долі да выплаты за кошт гэтай жа сумы даўгоў сыну», якога прыгаварылі да васьмі гадоў пазбаўлення волі за махлярства. Аксенцьеў сцвярджаў, што купіў 16,75% «Трайпла» за $70 у сувязі з атрыманай прапановай, а не ў кошт доўгу. Пры гэтым, паводле дадзеных на 2015 год, уся доля Япрынцава (33,5%) ацэньвалася прыкладна ў $50 млн. Аднак адказчык і «Трайпл» не змаглі падаць арыгінал дагавора. Тады суд не задаволіў пазоў.
Зараз у «Трайпле» лічаць дагавор нікчэмным у сувязі з яго прытворнасцю. Па меркаванні кампаніі, рэальныя намеры бакоў былі не ў здзяйсненні адваротнай здзелкі, а ў забеспячэнні вяртання доўгу. То бок бакі заключылі дагавор гарантыі. Усе пытанні ўжо ўрэгуляваныя.
Новы пазоў паследаваў пасля таго, як Іосіф Аксенцьеў паспрабаваў вярнуць доўг «Трайпла». У матэрыялах справы аб эканамічнай жыццяздольнасці «Трайпла» гаварылася аб крэдыторскай запазычанасці перад Аксенцьевым у памеры 18,344 млн рублёў. Але тады гэтая сума не падлягала ўключэнню ў рэестр патрабаванняў крэдытораў і павінна была пагашацца пасля завяршэння разлікаў з конкурснымі крэдыторамі. У мінулым годзе «Трайпл» завяршыў санацыю і выйшаў з банкруцтва, а ў расіяніна з’явілася магчымасць спагнаць грошы з беларускай кампаніі.
Зараз доля Юрыя Чыжа ў ТАА «Трайпл» складае 66,5%. Па 16,75% належыць Маміашвілі і самому таварыству. Аксенцьеў выйшаў з «Трайпла» на фоне рызыкі прызнання кампаніі банкрутам.
Калі зараз суд задаволіць пазоў, то Уладзімір Япрынцаў можа вярнуцца ў склад удзельнікаў «Трайпла», і спатрэбіцца перагляд шэрагу іншых спраў.
Сам Япрынцаў кажа, што на гэты момант лёс яго долі ў «Трайпле» яму не цікавы. Ён не хоча гаварыць аб правамернасці ці неправамернасці пазоўных патрабаванняў, «хай суд вынясе абгрунтаванае рашэнне».
Атрымаць каментар у Іосіфа Аксенцьева і Юрыя Чыжа пакуль не ўдалося.
Цяпер чытаюць
«Я асасін, бл*!» Эксперт-юрыст з СТБ неадэкватна паводзіў сябе на Зыбіцкай. Відэа сабрала мільёны праглядаў — хто ён13
Каментары