Археолагі пачалі раскопкі на Заслаўскім замку. У планах — выявіць вялікую браму
Да Дажынак плануюць закансерваваць і музеіфікаваць браму гэтага аднаго з першых бастыённых замкаў стараітальянскага тыпу на Беларусі. Вось што пра яго вядома.
Як паведамляе тэлеграм-канал Інстытута гісторыі НАН Беларусі, палявыя работы на тэрыторыі Заслаўскага замка пачаліся 2 чэрвеня.
Даследаванні праводзяцца ў межах дзяржаўнай навуковай праграмы «Грамадства і гуманітарная бяспека беларускай дзяржавы» (2021—2025) па заданні з дзіўнай назвай «Археалагічная спадчына як фактар забеспячэння гуманітарнай бяспекі».
Самыя старажытныя ўмацаванні гарадзішча «Вал», пад якой гэтае месца ўнесена ў Дзяржаўны спіс гісторыка-культурных каштоўнасцей (каб адрозніваць ад гарадзішча «Замэчак», дзе паводле падання жыла Рагнеда з сынам Ізяславам), узведзены на рубяжы XI-XII стагоддзя.
У канцы XVI — XVII стагоддзі, магчыма, як умацаваная рэзідэнцыя ўладальніка Заслаўя Івана Глябовіча, адначасова з кальвінскім зборам быў узведзены адзін з першых бастыённых замкаў на тэрыторыі Беларусі, які мае рысы стараітальянскай фартыфікацыйнай сістэмы.
У плане замак мае выгляд няправільнага чатырохвугольніка, абкружанага ровам. Бастыёны і валы, паводле даследаванняў XIX стагоддзя, былі першапачаткова абмураваны каменем.
Па цэнтры валоў былі дадатковыя бастыёны, якія добра бачныя на плане 1840 года. Да канца XIX ст. гэтыя дадатковыя ўмацаванні былі часткова разабраныя мясцовымі жыхарамі, але на валах захоўваліся рэшткі мураваных сцен і бруствераў.
На паўднёвым вале замка знаходзілася традыцыйная для зямель Беларусі двухпавярховая ўязная брама. Таўшчыня яе муроў дасягала 2 метраў. Брама мела падвойныя вароты і добра фланкіравалася з нарожнага бастыёна. Пад брамай знаходзілася турма ў выглядзе доўгага мураванага тунэля.
Роў абвадняўся праз сістэму сажалак на Свіслачы і Чарніцы, ператвараючы замак ва ўмацаванне астраўнога тыпу. 3 «местам» замак злучаў драўляны мост, апошні пралёт якога, як меркаваў гісторык Міхаіл Ткачоў, абапіраючыся на аналогію з іншымі замкамі, падымаўся з брамы спецыяльным калаўротам.
Ад магутнай брамы зберагліся ніжнія часткі сцен, якія цяпер і ўзяліся даследаваць археолагі.
Да даследавання сёння прыцягнуты не толькі навукоўцы-археолагі, але і рабочыя, валанцёры і навучэнцы — у тым ліку пры падтрымцы Мінскага райвыканкама.
Як паведамляецца, работы будуць працягвацца да канца чэрвеня з магчымым падаўжэннем у залежнасці ад умоў надвор’я. Па завяршэнні раскопак плануецца распрацоўка праекта для рэстаўрацыі і музеіфікацыі аб’екта.
Увосень гэтага года Заслаўе прыме абласныя Дажынкі. Правядзенне свята працаўнікоў сяла ўжо стала прычынай знішчэння гістарычных будынкаў карчмы, аптэкі і жылога дома на галоўнай Савецкай вуліцы Заслаўя, хоць яшчэ ў мінулым дзесяцігоддзі гэты аб'екты ахоўваліся як помнікі гісторыі і культуры.
У Заслаўі да Дажынак зачышчаюць гістарычную забудову, якую бралася ахоўваць дзяржава
Стаў вядомы сапраўдны год заснавання Менска. Адкрыццё было вострасюжэтным навуковым дэтэктывам
У Заслаўі знеслі да Дажынак карчму і краму, якія раней лічыліся помнікамі архітэктуры
Аднавіліся раскопкі на Менцы, цікавая знаходка ўжо ў першы дзень
Цяпер чытаюць
«Гэта была жывая камера сачэння». Што рабіла віцяблянка Кацярына, каб вызваліцца праз 5 гадоў замест прысуджаных 12 гадоў10
Каментары
ўсяіснага "выявіць" (- ЁСЦЬ, ЯК МІНІМУМ 4 БЕЛАРУСКІЯ СЛОВЫ ДЛЯ ЯГО ЗАМЕНЫ!!! Навошта яго САВАЦЬ праз артыкул! )
і
неіснуючага НІДЗЕ!!!! "нарожнага" !