Вынесены прысуд за гібель падлетка на трансфарматарнай падстанцыі ў Мінску
У Мінску двое супрацоўнікаў прадпрыемства, 39 і 53 гадоў, атрымалі па 4 гады абмежавання волі без накіравання ў папраўчую ўстанову. Іх прызналі вінаватымі ў службовай халатнасці, якая прывяла да гібелі 16-гадовага хлопца. Таксама суд часткова вызваліў іх ад пакарання на 1 год — па Законе аб амністыі.
У чэрвені 2023 года прадпрыемствам былі набытыя пад знос будынкі на вул. Я. Маўра. Нягледзячы на тое, што будынкі выведзеныя з эксплуатацыі, трансфарматарная падстанцыя не была адключаная і знаходзілася пад напругай.
У пачатку 2025 года два школьнікі зайшлі ў закінуты будынак, які калісьці належаў цэглаваму заводу. Туды лёгка можна было прайсці. Пры гэтым трансфарматарная падстанцыя была пад напругай, а шафы з правадамі — не зачыненыя.
Адзін з падлеткаў паспрабаваў зрэзаць медныя кабелі і атрымаў смяротны ўдар токам. Другі выклікаў хуткую, але сябра выратаваць не ўдалося.
Абвінавачаныя — работнікі прадпрыемства, якое набыло гэтыя будынкі: адзін з іх — намеснік дырэктара, другі — начальнік энергамеханічнай службы.
Замест таго, каб адключыць падстанцыю і агарадзіць небяспечныя месцы, яны не зрабілі нічога — нават калі пачалі прыходзіць афіцыйныя папярэджанні.
Абодвух прызналі вінаватымі па арт. 428 ч.2 Крымінальнага кодэкса (халатнасць, што прывяла да гібелі чалавека).
Суд прыгаварыў іх да абмежавання волі на 4 гады без накіравання ў калонію. Ім забаранілі займаць кіраўнічыя пасады 5 гадоў. А таксама часткова вызвалілі ад пакарання па амністыі — мінус 1 год.
З прадпрыемства на карысць маці загінулага падлетка спагнана кампенсацыя маральнай шкоды ў памеры 60 тысяч рублёў.
Цяпер чытаюць
Беларуска набіла на целе партрэты Лукашэнкі і яго сыноў, Умкі, Пуціна ды Сі Цзіньпіна12
Каментары