Бяляцкі пра магчымыя перамовы: Размаўляць прыходзіцца і з бандытамі
У інтэрв'ю LRT нобелеўскі лаўрэат Алесь Бяляцкі, што выйшаў на волю ў мінулую суботу, адказаў на пытанне, ці заўсёды перамовы з беларускім рэжымам або з любым іншым рэжымам наконт вызвалення палітычных зняволеных з’яўляюцца кампрамісам з маральнымі каштоўнасцямі, ці часам гэта адзіная магчымасць выратаваць чалавечыя жыцці.
«Ну, размаўляць даводзіцца і з бандытамі. Калі вызваляюць закладнікаў, вы вядзеце перамовы з піратамі, бандытамі і тымі, хто ўтрымлівае людзей у палоне. Трэба разумець, што з такімі людзьмі варта выкарыстоўваць адпаведныя інструменты і размаўляць на зразумелай для іх мове, бо, на маю думку, цяперашняя ўлада ў Беларусі не разумее ніякай нармальнай чалавечай мовы, не разумее нармальных чалавечых адносінаў», — мяркуе Алесь Бяляцкі.
«Яны робяць усё, каб утрымацца пры ўладзе. І палітычныя зняволеныя для іх — гэта ўмова захавання гэтай улады. Такім чынам яны нейтралізуюць сваіх праціўнікаў. Яны хапаюць людзей з іншым меркаваннем. Яны пашыраюць рэпрэсіі супраць прадстаўнікоў беларускай культуры і тых, хто размаўляе па-беларуску. Ідзе вайна супраць усяго беларускага, супраць самой Беларусі. Па сутнасці, гэта антыбеларускі рэжым, які дзейнічае супраць уласнага народа выключна дзеля захавання сваёй улады.
Трэба разумець, што іх немагчыма змяніць прыгожымі словамі ці добрымі намерамі. Яны не змянілі сваю пазіцыю. А цяперашні працэс абмену палітычных зняволеных насамрэч з’яўляецца вымушаным. Беларускія ўлады найперш зацікаўленыя ў зняцці эканамічных санкцый. Але яны не зацікаўленыя ў тым, каб змяняць сітуацыю да лепшага, даваць людзям магчымасць жыць свабодна, свабодна выказваць сваё меркаванне», — мяркуе правабаронца.
Бяляцкі параўноўвае сённяшнюю сітуацыю ў Беларусі, калі немагчыма з’явіцца на тэлебачанні, не існуе незалежных газет, з савецкімі часамі.
«Не з апошнім дзесяцігоддзем, а з нашмат больш раннім перыядам, калі любая альтэрнатыўная інфармацыя і любыя альтэрнатыўныя меркаванні людзей падаўляліся. Менавіта такая сітуацыя сёння склалася ў Беларусі. Таму, дамагаючыся вызвалення палітычных зняволеных, трэба вельмі добра разумець, з кім вы маеце справу», — зазначае ён.
Бяляцкі расказаў, як даведаўся ў СІЗА пра Нобелеўскую прэмію
Алесь Бяляцкі сустрэўся з прэзідэнтам Літвы Наўседам
Бяляцкі пра першы дзень на волі: Псіхалагічна я дзесьці яшчэ там, але сітуацыя для мяне не новая
Алесь Бяляцкі ўпершыню за тры гады сустрэўся з жонкай ВІДЭА
Што расказаў Алесь Бяляцкі адразу пасля вызвалення
Каментары