Беларуска падзялілася ўражаннямі ад аўтобуснага тура ў Дагестан — 32 гадзіны да першага начлега
Блогерка Паліна выбралася з маці ў экзатычны адпачынак і расказала пра яго дэталі ў тыктоку.
Каб трапіць у Дагестан, Паліна набыла месца ў туры аднаго з беларускіх турагенцтваў. Тур быў аўтобусны, таму дзяўчыне і яе маці давялося перажыць доўгую дарогу. Нашмат даўжэйшую, чым у пераездах па Еўропе: да першага начлега, які быў запланаваны ў Пяцігорску, турысты ехалі ажно 32 гадзіны, а агульны шлях да Дагестана заняў два дні.
Група набралася вялікая — ажно 50 беларусаў. Паліна расказала, як удзельнікі тура бавілі гэты час:
«Я даехала да Гомеля і ўжо ў цэлым стамілася, думала — капец. Сто гадоў не ездзіла на аўтобусе так далёка. Але потым ці звыкаешся, ці зміраешся з тым, што дарога далёкая, і ўжо было нармальна.
Калі б яшчэ вай-фай быў на шляху, было б увогуле цудоўна, але ён дазваляў толькі загрузіць паведамленні ў тэлеграме. Спрабавала спаць, глядзела ў акно… Зразумела, што дарога цяжкая. Мы двойчы за гэтыя 32 гадзіны спыняліся ў прыдарожных кафэшках, каб паесці гарачай ежы, у астатні час спыняліся на запраўках кожныя тры гадзіны».
На гэтым побытавыя непрыемнасці толькі пачыналіся, бо ў пяцігорскім гатэлі, дзе пасялілі групу, не было гарачай вады.
Тур быў экстрэмальны: напрыклад, давялося палазіць па пячорах у гумавых ботах. Турысты наведалі горы, у тым ліку пабывалі ля Эльбруса, бачылі шмат маляўнічых пейзажаў, а таксама былі ў Дзербенце — гэта самы старажытны горад Расіі — і на беразе Каспійскага мора. На зваротным шляху група спынялася для адпачынку ў Варонежы.
Тры дні група жыла ў горных дамках з цудоўным відам. Паліне месца дужа спадабалася, але, мяркуючы па каментарах, не ўсіх турыстаў туды засяляюць — у мінулыя заезды гэтага тура некаторых размяшчалі і ў падвальных памяшканнях.
Тур, у які паехала Паліна, каштаваў 350 даляраў на чалавека. З улікам дадатковых выдаткаў у адпачынку агулам атрымалася сума прыкладна ў 750 даляраў.
Беларуска кажа, што засталася ў захапленні ад Дагестана: «Ці варта туды ехаць? Так, і як мага хутчэй, мне падаецца. Дагестан імкліва развіваецца як турыстычны кірунак, і пакуль там адэкватныя цэны — яны яшчэ не зразумелі, што на турыстах можна зарабляць нашмат больш».
«Наша Нiва» — бастыён беларушчыны
ПАДТРЫМАЦЬ
Каментары