Pa darozie sa Šviecyi ŭ Biełaruś mašyna zhubiła minimum 300 tysiač kiłamietraŭ prabiehu — ciapier jaje pradajuć za $15 tysiač
Aŭtamabili sa skarektavanym prabieham u Biełarusi — nie redkaść. Ale ŭ niekatorych vypadkach roźnica pamiž realnymi ličbami i pakazčykami na adomietry moža ŭrazić navat byvałych aŭtamabilistaŭ.
Za 14 999 dalaraŭ u Hrodnie pradajecca Seat Leon 2019 hoda vypusku. Pad kapotam u jaho 1,5-litrovy ruchavik, jaki ad zavoda pracuje nie tolki na bienzinie, ale i na mietanie. Zajaŭleny prabieh aŭtamabila — 160 400 kiłamietraŭ. Ale jość niuans.
Da taho, jak trapić u Biełaruś, heta mašyna jeździła ŭ Šviecyi, a dakładniej — pracavała ŭ jakaści taksi. Tamu realny prabieh u jaje značna bolšy za toj, što paznačany ŭ abjavie.
Kab atrymać infarmacyju pra sapraŭdny prabieh, dastatkova viedać VIN-numar aŭtamabila i śpiecyjalnyja šviedskija sajty, na jakich biaspłatna možna pahladzieć danyja.
Zrazumieć, što VIN-numar ukazany biez pamyłak i što aŭtamabil u abjavie i ŭ šviedskich bazach adzin i toj ža, dapamahaje fota, na jakim bačnaja tablička z numaram kuzava i inšaj infarmacyjaj.
Pravierka pa numary kuzava na sajcie biluppgifter.se pakazvaje, što apošni zafiksavany prabieh aŭtamabila ŭ Šviecyi — 45 562 šviedskija mili (1 šviedskaja mila = 10 km). Taksama sajt pakazvaje, ź jakim numaram jeździŭ hety aŭtamabil — CCA04A.
Inšy sajt, dzie taksama zachoŭvajecca infarmacyja pra aŭto, padaje danyja pra prabieh užo ŭ zvykłych dla nas kiłamietrach, a nie ŭ šviedskich milach. Hety resurs paćviardžaje tuju ž samuju infarmacyju.
Padčas apošniaj inśpiekcyi ŭ Šviecyi, jakaja adbyvałasia ŭ samym pačatku 2024 hoda, prabieh hetaha SEAT składaŭ 455 620 kiłamietraŭ, a apošni zafiksavany prabieh padčas prodažu praz aŭkcyjon — 459 010 kiłamietraŭ. Heta na 300 tysiač bolš za prabieh, ź jakim mašynu pradajuć u Biełarusi.
Admietna, što paśla prodažu na aŭkcyjonie ŭ sakaviku 2024 hoda mašyna jašče niekalki miesiacaŭ zastavałasia ŭ Šviecyi — pakul 18 lipienia 2024 hoda nie była aformlena na ekspart.
Ale vyhladaje, sa Šviecyi SEAT nie adrazu adpraviŭsia ŭ Biełaruś, pakolki razmytnili jaho ŭ nas tolki praz try miesiacy paśla źniaćcia z uliku ŭ Šviecyi — 31 kastryčnika 2024 hoda.
Kolki jašče za paŭtara hoda prajechaŭ hety Seat Leon — historyja zamoŭčvaje. Jak i da kanca niezrazumieła, na jakim etapie jon zhubiŭ nie mienš za 300 tysiač kiłamietraŭ prabiehu. Ale fakt zastajecca faktam: jašče paŭtara hoda tamu mašyna pradavałasia ŭ Šviecyi z prabieham 459 tysiač kiłamietraŭ, a ciapier u Biełarusi — z 160 tysiač.
Kamientary