З’явілася нечаканая версія прычыны знікнення Мельнікавай, якая «шмат што тлумачыць»
Версія, якую агучылі ў аўтарскім праекце «Саша, што ты нясеш?!» рэдактары Reform.news Фёдар Паўлючэнка і Аляксандр Атрошчанкаў, хаця і не дае адказы на ўсе пытанні, але гэты «пазл арганічна ўпісваецца ў агульную карціну».
«Ёсць такая, даволі цікавая версія, што Мельнікава магла быць цяжарнай. Ёсць сведчанні — знаёмыя распавядалі (за што купіў, за тое і прадаю), што нібыта ў лістападзе яна паводзіла сябе так, як паводзіць сябе чалавек, які можа быць цяжарным», — кажа Паўлючэнка.
Па сведчаннях знаёмых, у Мельнікавай, настрой часта змяняўся, іншыя характэрныя прыкметы таксама былі.
Калі адлічыць ад лістапада, чатыры месяцы — якраз той тэрмін, калі цяжарнасць ужо становіцца бачнай. І, магчыма, менавіта гэта і падштурхнула яе да ад’езду, мяркуюць аўтары праекта.
Калі прыняць гэтую версію як рабочую, яна, вядома, не тлумачыць усяго — ці была яна агентам, ці не, хто ўвогуле вінаваты і г. д., але гэтая дэталь можа добра патлумачыць, чаму Мельнікава дагэтуль не з’явілася публічна, лічаць аўтары праграмы.
Бо калі адлічыць ад лістапада, то цяпер Мельнікава якраз мусіла б нараджаць. І, адпаведна, малаімаверна, што яна ўдзельнічала б у нечым публічным ці мела б магчымасць падстаўляцца пад медыйны ціск.
«Ну, вось такая гіпотэза. Мы, здаецца, у эфіры яе не агучвалі, бо, шчыра кажучы, не наша справа — хто ад каго цяжарны. Але паспрабуйце ўставіць гэты пазл у агульную карціну — здаецца, ён даволі арганічна ўпісваецца і шмат што тлумачыць», — мяркуюць вядоўцы праграмы.
На іх думку, калі прыняць версію, то становіцца зразумела, чаму Мельнікава не на публіцы — «бо, напэўна, не да таго». І нават калі яна цяпер у Беларусі, а можа і не ў Беларусі — усё роўна відавочна, чаму ёй маглі спатрэбіцца грошы. «Мацярынскі капітал», — пажартавалі слухачы ў чаце пра скрадзеныя грошы.
«Мы гэтую версію з рознымі людзьмі пракручвалі. Калі ўпершыню яе чуеш — здаецца, нешта дзіўнае. А потым калі пакруціць, пачынаеш разумець, што, калі яе ўставіць у агульную схему, шмат чаго пачынае набываць сэнс», — кажа Паўлючэнка.
Анжаліка Мельнікава пакінула тэрыторыю Польшчы і Еўразвязу 26 лютага 2025 года і паляцела ў Лондан. Паводле расследавальнікаў, за дзень да вылету яна зарэзервавала нумар у пяцізоркавым гатэлі на Шры-Ланцы, дзе ўжо бывала раней. З 28 лютага да 7 сакавіка Мельнікава жыла ў тым гатэлі з дзецьмі. 7 сакавіка Мельнікава з дзецьмі паляцела ў Дубай, там ейны след губляецца. 25 сакавіка яна перастала выходзіць на сувязь. Дзе яна і што з ёй, няма інфармацыі.
Цяпер чытаюць
У Беларусі множацца пляцоўкі для танцаў на свежым паветры — паглядзіце, як адпальваюць разам моладзь і пенсіянеры ў Серабранцы11
Каментары