Галоўнакамандуючы НАТА: Мы маем відавочную вайсковую перавагу над Расіяй

Паўночнаатлантычны альянс мае відавочную вайсковую перавагу над Расіяй. У гэтым перакананы галоўнакамандуючы Аб’яднанымі ўзброенымі сіламі НАТА ў Еўропе, генерал-лейтэнант ВПС ЗША Алексус Грынкевіч.

«Вайсковыя магчымасці, якія мы задзейнічалі б у выпадку маштабнага канфлікту, значна пераўзыходзяць магчымасці Масквы», — заявіў Грынкевіч у інтэрв’ю нямецкаму штотыднёвіку Der Spiegel, апублікаваным 16 кастрычніка.

Паводле генерала, у арсенале Расіі няма ні сучасных знішчальнікаў F-35, ні такой колькасці сучасных эсмінцаў і падводных лодак, якой валодае НАТА.

У сувязі з гэтым Грынкевіч упэўнены, што Расія не пачне шырокамаштабнага нападу на еўрапейскія краіны з выкарыстаннем звычайных узбраенняў.

«Пуцін звяртаецца да іншых метадаў, напрыклад да дыверсій, бо ў яго няма іншых варыянтаў. Пуцін не хоча прамога канфлікту», — адзначыў Алексус Грынкевіч.

Ён удакладніў, што ўстрымліваецца ад выкарыстання тэрміна «гібрыдныя атакі» для апісання такіх дзеянняў Масквы.

«Трэба называць рэчы сваімі імёнамі: дыверсіі, падпалы або тэрарыстычныя атакі — гэта дакладныя вызначэнні, на якія ёсць канкрэтныя адказы», — патлумачыў Грынкевіч.

На пытанне інтэрв’юера, ці знаходзіцца Еўропа ўжо ў стане вайны з Расіяй, галоўнакамандуючы НАТА адказаў:

«Гэта небяспечная гульня Уладзіміра Пуціна. Ён хоча пераканаць нашых грамадзян, што падтрымліваць Украіну небяспечна і што гэта можа прывесці да вайны з Расіяй. Але пакуль гэта не спрацоўвае».

Каментуючы нядаўнія пагрозы Масквы, якая заявіла, што ізаляцыя Калінінградскай вобласці прывядзе да прамога ваеннага канфлікту, Грынкевіч зноў падкрэсліў, што НАТА з’яўляецца абарончым альянсам і дзейнічае толькі ў выпадку нападу на яго.

Аднак праз вайну ва Украіне пазіцыі Расіі ў Калінінградскай вобласці прыкметна аслаблі, у той час як НАТА ўмацавала свае пазіцыі ў Балтыйскім рэгіёне, адзначыў галоўнакамандуючы сіламі альянсу ў Еўропе.

«З ваеннага пункту гледжання сітуацыя там (у Калінінградзе. — Рэд.) неспрыяльная для Расіі», — сказаў Грынкевіч.

Каментуючы дыверсію ў аэрапорце Лейпцыг/Гале, у арганізацыі якой абвінавачваюць Расію, генерал НАТА заявіў, што сама спроба стала «пераходам мяжы».

«Калі б напад меў поспех, у паветра ўзляцелі б некалькі цалкам запраўленых самалётаў «Антонаў», і, верагодна, былі б загінулыя», — адзначыў генерал.

Ён устрымаўся ад прагнозаў наконт таго, як НАТА магла б дзейнічаць у такім выпадку.

«Нам патрэбныя велізарныя колькасці аднаразовых баявых дронаў, больш танныя крылатыя ракеты і шмат чаго іншага», — дадаў ён.

За некалькі дзён да гэтага Алексус Грынкевіч на канферэнцыі па бяспецы ў Варшаве прадставіў новую канцэпцыю НАТА пад назвай Theory of Victory («Тэорыя перамогі»). Згодна з ёй, абарона тэрыторыі альянсу ў выпадку магчымай агрэсіі павінна пачынацца яшчэ да таго, як праціўнік адкрые агонь.

Канцэпцыя прадугледжвае тры этапы ваеннага разгрому патэнцыйнага агрэсара. На першым этапе сілы НАТА павінны спыніць напад (Block — «Блакаваць»). Калі праціўнік працягне баявыя дзеянні, неабходна зламаць яго наступальны імпульс і не дапусціць далейшага прасоўвання (Blunt — «Прытупіць»). Калі і гэтага будзе недастаткова, дакумент прадугледжвае разгром варожых войскаў і ўсёй ваеннай сістэмы, якая іх забяспечвае і кантралюе (Break — «Знішчыць»).

У выпадку нападу на першым этапе галоўная роля адводзіцца сухапутным войскам НАТА на перадавых рубяжах. Яны павінны будуць спыніць наступленне, скаваць і знішчаць атакуючыя злучэнні.

Адначасова авіяцыя і вайскова-марскія сілы пры падтрымцы касмічных і кібернетычных сродкаў павінны як мага хутчэй забяспечыць перавагу ў паветры і на моры.

Калі праціўнік, якога ў канцэпцыі не называюць, працягне наступленне або ўвядзе дадатковыя сілы, НАТА плануе мэтанакіравана вывесці са строю яго ваенную машыну.

• 8
• 0
• 5
• 1
• 0
• 0
• 0
• 0