Жанчына займалася сэксам з будысцкімі манахамі, а пасля шантажавала іх

Як піша The Times, у Тайландзе разгарэўся гучны скандал, звязаны з 35-гадовай Вілаван Эмсават (Wilawan Emsawat) пад нікам Гольф. Паводле падазрэнняў паліцыі, яна шантажавала высокапастаўленых манахаў, маючы відэа– і фотадоказы іх палавых сувязяў з ёю.

Вілаван была арыштаваная 15 ліпеня ў сваім шыкоўным доме паблізу Бангкока. Жанчыну абвінавачваюць у адмыванні грошай і атрыманні выкрадзенай маёмасці.

Як паведамляе Цэнтральнае следчае ўпраўленне Тайланда, на пяці тэлефонах, канфіскаваных падчас затрымання, знойдзеныя відэа і фота, на якіх жанчына займаецца сэксам з рознымі манахамі. На некаторых з іх — манаскае адзенне шафранавага колеру.

Паведамляецца, што дзевяць манахаў, сярод якіх былі і настаяцелі вядомых храмаў, былі пазбаўлены сану. Як мінімум двое схаваліся.

Палітычны камітэт Сената прапануе ўнесці змены ў закон, каб прадугледзець крымінальную адказнасць для жанчын, якія маюць палавыя зносіны з манахамі. Гэта выклікала крытыку, бо шмат хто лічыць, што адказнасць павінны несці ў першую чаргу самі манахі.

«Гэты скандал раскрывае сістэму хлусні і крывадушнасці сярод высокага духавенства, — цытуе выданне аглядальніцу Bangkok Post Саніцуда Экачай (Sanitsuda Ekachai). — Жанчыны з даўніх часоў у традыцыйных вучэннях прадстаўляліся як «ворагі духоўнай чысціні манахаў»… І цяпер, калі маральны заняпад духавенства відавочны, адказнасць ускладаюць на жанчыну, а манахі паўстаюць у ролі ахвяраў».

Скандал пачаўся пасля таго, як раптоўна знік Пхра Тхэп Вачырапамок (Phra Thep Wachirapamok), вядомы як Арч — настаяцель аднаго з вядомых храмаў у Бангкоку. У чэрвені ён нечакана пакінуў манаскі сан і ўцёк у Лаос.

Расследаванне паказала, што ў яго былі адносіны з Вілаван, якая сцвярджала, што цяжарная ад яго, і патрабавала 7,8 мільёна бат (каля 240 000 даляраў). Калі настаяцель адмовіўся плаціць, жанчына паведаміла іншым манахам пра сувязь, і ён пакінуў краіну.

Паліцыя знайшла на тэлефонах жанчыны паведамленні і інтымныя відэа з удзелам іншых будысцкіх лідараў, якія будуць аўтаматычна пазбаўленыя сану за парушэнне зароку цноты.

Цяпер следства спрабуе высветліць, ці плацілі яны Вілаван з асабістых сродкаў, ці выкарыстоўвалі грошы храмаў.

Следчыя таксама прадставілі банкаўскія дакументы, згодна з якімі праз рахункі жанчыны за апошнія тры гады прайшло каля 385 мільёнаў бат (прыкладна 11,9 мільёна даляраў). Значную частку гэтых грошай, як сцвярджае затрыманая, яна патраціла на нелегальныя інтэрнэт-гульні.

Некаторыя манахі прызналіся ў адносінах з Вілаван. Паводле адной з версій, яна выходзіла на іх праз сацыяльныя сеткі. Адзін з манахаў сцвярджае, што знаходзіўся з ёй у стабільных доўгатэрміновых адносінах і нават атрымаў ад яе ў падарунак аўтамабіль. Але калі даведаўся, што яна сустракаецца з іншым манахам, і яна пачала патрабаваць грошы — адносіны сапсаваліся.

Кіраўнік следчай групы генерал-маёр паліцыі Чарункіят Панкаеў (Charoonkiat Pankaew) заявіў, што яго каманда будзе аналізаваць кожнае відэа ў пошуках доказаў парушэння манаскага кодэксу.

«Кожны, хто яго парушае, мусіць быць пазбаўлены сану», — сказаў ён. — «Мы хочам захаваць давер грамадства да будызму. Гэта чалавечая слабасць, але ігнараваць яе нельга».

• 1
• 0
• 15
• 6
• 0
• 1
• 1
• 0