«Камунарка» і «Спартак» пачнуць рабіць цукеркі з венесуэльскіх какава-бабоў
Сыравіна з Венесуэлы можа абысціся на 15—20% танней, чым з Афрыкі.
Кандытарскія фабрыкі «Камунарка» і «Спартак» атрымалі першыя пробныя партыі какава-бабоў з Венесуэлы. На гэтым тыдні яны прыступяць да іх перапрацоўкі, піша БелТА.
Эксперыментаваць з сыравінай вымушае рост цэн на яе ва ўсім свеце. Як распавёў кіраўнік «Белдзяржхарчпрама» Алег Жыдкоў, паколькі «наша кандытарская галіна імпартазалежная», спачатку прадпрыемствы спрабавалі справіцца з гэтым за кошт утрымання цаны на гатовую прадукцыю.
— Мы іх не павышалі і працавалі ў межах той эканомікі, якая нам дазваляла стрымліваць гэты імклівы рост сабекошту, у надзеі, што, напэўна, праз нейкі перыяд часу, магчыма, цана вернецца. Але ўжо 2024 і 2025 гады мы працуем і бачым, што цана істотна не змяняецца.
Алег Жыдкоў нагадаў, што на цану какава-бабоў у першую чаргу ўплывае ўраджайнасць.
— Ураджай какава-бабоў збіраецца два разы на год — у маі і кастрычніку-лістападзе. Па ўраджайнасці кастрычніка-лістапада мы ўжо можам прагназаваць, якой будзе цана да канца года і на пачатак 2026 года. Пакуль перадумоў да таго, што цана пойдзе ўніз, мы не бачым, паколькі чаканыя аб’ёмы ўраджаю ніжэйшыя за той попыт, які існуе на сусветным рынку.
Традыцыйна Беларусь закупляе какава-бабы ў краінах Афрыкі, але сітуацыя з цэнамі вымусіла шукаць новых пастаўшчыкоў, цяпер ужо і ў Лацінскай Амерыцы.
— Мы сёння пачынаем атрымліваць пробныя партыі з Венесуэлы. Мы атрымалі і на «Камунарку», і на «Спартак» па 100 тон какава-бабоў дастаткова добрай якасці. Яны нядрэнна зарэкамендавалі сябе ў выглядзе ўзораў.
На гэтым тыдні фабрыкі прыступяць да перапрацоўкі гэтых какава-бабоў.
Паводле прагнозаў «Белдзяржхарчпрама», сыравіна з Венесуэлы можа абысціся на 15—20% танней, чым у афрыканскіх вытворцаў.
Цяпер чытаюць
Святлана Ціханоўская завяла трэдс. Што ёй пішуць беларусы?2
Каментары