Памятаеце гісторыю з таблічкай «Дапамажыце — дах» у Магілёве? Мужчыну, што прасіў дапамогі, выгналі з таго дома
Гісторыя пра інваліда-магілёўца, які не можа паправіць дах, разляцелася па сацсетках і медыя. Жыхар Магілёва Генадзь Зайцаў расказаў, што не ў стане ліквідаваць наступствы ліпеньскага ўрагану. Стыхія сур’ёзна пашкодзіла дах дома, рэакцыі з боку гарадскіх службаў не было, а сам рады ён не дае: мужчына адзінокі, перажыў анкалогію. Мужчына павесіў просьбу пра дапамогу на дах і спадзяваўся на неабыякавых людзей. Дах паправілі, а мужчыну за падняты шум выкінулі на вуліцу родныя.
Гісторыю Генадзя Зайцава, інваліда, які павесіў на сваім доме таблічку з просьбай дапамагчы адрамантаваць дах, расказала выданне «МогилевОнлайн». Яно ж апублікавала працяг гісторыі.
У першай публікацыі выданне расказала, што Генадзь, якому 55 гадоў, перанёс анкалогію, мае інваліднасць ІІІ групы і жыве адзін на невялікую дапамогу. Грошай на рамонт у яго няма, бацькі даўно памерлі.
Мужчына звяртаўся ва ўсе магчымыя службы: у ЖЭУ №15 і №20, дзе яму паведамілі, што дом не ў іх вядзенні, а таксама ў прафсаюз «Трансмаша», дзе ён раней працаваў. Але дапамогі не атрымаў нідзе.
Таму мужчына павесіў просьбу пра дапамогу на дах і спадзяваўся на неабыякавых людзей.
Праз некалькі дзён пасля публікацыі гісторыі да выдання звярнулася пляменніца Генадзя — Ганна Будзіч. Яна патлумачыла, што мужчына не з'яўляецца ўласнікам дома, а толькі пражываў у ім з яе дазволу — на просьбу бабулі.
З яе слоў, Зайцаў не меў права на пражыванне там, не плаціў за камунальныя паслугі — яна паказала квітанцыю пра доўг у 17 рублёў.
Жанчына расказала, што пасля таго, як пра гісторыю даведаліся ўлады, ёй пачалі тэлефанаваць з патрабаваннямі тлумачэнняў, хто такі Зайцаў і чаму ён жыве па гэтым адрасе.
Жанчына даводзіць, што Генадзь перабольшвае сваю інваліднасць — маўляў, у яго толькі некалькі згубленых фаланг пальцаў, і ён, паводле яе, не мае вялікіх абмежаванняў у працы. Да таго ж «бэкграўнд у гэтага чалавека вельмі нядобры, ён прынёс шмат болю сваёй сям'і і сваякам».
Паводле Ганны, дах у доме сапраўды быў пашкоджаны, але сам будынак стаіць у чарзе на знос, таму ніхто з уласнікаў не планаваў укладацца ў яго рамонт.
Нягледзячы на гэта, пасля грамадскага рэзанансу, рамонт даху быў зроблены — з удзелам супрацоўнікаў ЖЭУ, МНС і неабыякавых людзей.
Таблічка з просьбай аб дапамозе знікла, пашкоджаныя дрэвы на тэрыторыі былі спілаваны.
Аднак Ганна Будзіч заявіла: нягледзячы на тое, што дах паправілі, Зайцаў там болей жыць не будзе.
Паводле слоў сваячкі інваліда, уласнікі дома прынялі рашэнне выселіць яго.
«Мы абмеркавалі сітуацыю з усімі ўласнікамі, і з нашага боку як уладальнікаў прынята рашэнне выселіць яго і больш ніколі яго не бачыць. За што змагаўся, на тое і напароўся. Цяпер Генадзя Зайцава чакаюць праверкі, паколькі ён з'яўляецца дармаедам і не прыносіць карысці эканоміцы дзяржавы», — сказала суразмоўца.
Трамп заявіў, што вядзе з Лукашэнкам перамовы пра вызваленне часткі з 1400 палітвязняў9
Каментары