Кампанія пашкадавала змарнелага хаскі і жорстка забіла яго гаспадара. Жонка забітага таксама далучылася да катаванняў
П'яны канфлікт, які абярнуўся жудасным забойствам, адбыўся ў райцэнтры ў Віцебскай вобласці. Выпадковая сустрэча з няшчаснай жывёлай скончылася забойствам чалавека, піша «Народная Газета».
Усё пачалося з таго, што кампанія — Арцём, непаўналетні Кірыл і раней судзімы Дзяніс — натрапілі на змарнелага хаскі ў двары. Яны вырашылі, што за сабакам дрэнна даглядваюць, і ўзялі яго з сабой.
Праз знаёмых даведаліся, што гаспадар сабакі — Ігар — знаходзіцца ў гасцях у тым жа пад’ездзе.
Мужчыны, добра падпіўшы, вырашылі высветліць адносіны з Ігарам. Пачалася сварка: Дзяніс абвінаваціў гаспадара ў жорсткім абыходжанні з жывёлай, той у адказ — у непатрэбным умяшанні. У выніку Ігара пабілі. Праз жанчыну, у якой ён гасціў, канфлікт удалося прыпыніць. Але адзін з кампаніі пакінуў Ігару нумар тэлефона для «далейшага разбіральніцтва».
Злы і прыніжаны Ігар вярнуўся дадому і вырашыў патэлефанаваць. У стане моцнага алкагольнага ап’янення ён спрабаваў дамовіцца пра вяртанне сабакі, але не змог нават выйсці з дому.
Замест яго на сустрэчу вырашыла пайсці ягоная жонка Рыма.
Але замест таго, каб абараніць мужа, яна пачала наракаць на яго, абвінаваціўшы ў жорсткасці не толькі да сабакі, але і да яе самой. «Ён і мяне лупіць пастаянна! Жыць з ім немагчыма!» — сказала яна.
«Вядзі да яго!» — запатрабаваў Дзяніс. І Рыма пагадзілася.
У кватэры на ложку спаў яе п’яны муж. Тое, што пачалося потым, цягнулася некалькі гадзін і было знята на тэлефоны самімі забойцамі.
Яго білі нагамі, кулакамі, цягалі па кватэры. П’яны ўшчэнт Ігар не мог нават супраціўляцца, не тое што даць адпор. Калі ён страчваў прытомнасць, яго цягнулі ў ванную, аблівалі вадой і працягвалі біць.
Жонка ж накрыла для гасцей стол з спіртным, і ў перапынках паміж пабоямі агрэсія кампаніі толькі расла.
Жанчына і сама не засталася ўбаку — агрэла мужа па галаве патэльняй.
Апагеем стаў эпізод, калі двое з кампаніі памачыліся на ахвяру са словамі: «Вось так трэба з такімі абыходзіцца!» Гэта таксама яны знялі на відэа і разаслалі ў чатах, пахваліўшыся сваёй абаронай жывёл.
Потым нерухомае цела паклалі ў ванну, госці сышлі, жонка таксама спакойна пайшла спаць.
Прачнуўшыся раніцай, жанчына не адразу ўспомніла пра ўчарашняе, пакуль не знайшла ў ваннай цела мужа. Калі зразумела, што ён памёр, выклікала хуткую, разам з той прыехала і міліцыя.
Жанчына спачатку заявіла, што ў кватэру да іх уварваліся невядомыя. Але запісы з камер назірання хутка вывелі на след маладых людзей.
Увесь гэты час дзесяцігадовая дачка Рымы і Ігара гасцявала ў бабулі. Гэта ўратавала дзіця ад страшнага відовішча.
Суд прызнаў усіх вінаватымі ў забойстве, здзейсненым з асаблівай жорсткасцю групай асоб.
Рашэннем суда Арцём (галоўны зачыншчык) атрымаў 20 гадоў пазбаўлення волі. Раней судзімы Дзмітрый — 18 гадоў калоніі. Непаўналетні Кірыл — 11 гадоў выхаваўчай калоніі. Рыма, жонка забітага — 8 гадоў пазбаўлення волі.
Суд таксама пазбавіў жанчыну бацькоўскіх правоў. Дзяўчынка цяпер жыве з цёткай — сястрой забітага бацькі.
Пра лёс няшчаснага сабакі, ці знайшоў ён новых гаспадароў, нічога не вядома.
Цяпер чытаюць
Памятаеце кадэта, які на сустрэчы з Лукашэнкам смела выступіў па-беларуску? Ён выехаў з краіны18
Каментары