«Пасядзіце ў нас на ІЧУ без матраца». З'явіўся аўдыязапіс, як сілавікі вядуць «выхаваўчыя гутаркі» з беспрацоўнымі
Сілавікі апошнім часам актыўна ўзяліся за «дармаедаў»: праводзяць «рэйды» па выяўленні непрацаўладкаваных і выклікаюць іх на «выхаваўчыя гутаркі» ў РУУС. «Люстэрка» атрымала аўдыязапіс адной з такіх сустрэч, якая прайшла ў Кастрычніцкім РУУС Гродна. На ёй намеснік начальніка УУС пераконваў прысутных знайсці афіцыйную працу. Палохаў, што «інакш будзе вельмі дрэнна». І абяцаў, што хутка ў Беларусі жыццё будзе як у Эміратах.
«Вазьміце сябе за галаву. Мы з вас не злезем»
Афіцыйна сустрэча называлася «прафілактычнае мерапрыемства ў тым ліку па працаўладкаванні». У «паведамленні аб неабходнасці яўкі» пісалі: прыйсці абавязкова. У адваротным выпадку пагражалі «прыводам» і іншымі «мерамі рэагавання».
У выніку ў будынку раённага УУС удалося сабраць некалькі дзясяткаў чалавек. Перад тымі, хто прыйшоў, выступіў першы намеснік начальніка Кастрычніцкага РУУС Гродна — начальнік міліцыі грамадскай бяспекі Мікалай Нічыпар. Уся яго прамова зводзілася да таго, што трэба знайсці працу і перастаць лічыцца ў базе «не занятых у эканоміцы».
«Кіраўніцтва міліцыі грамадскай бяспекі Кастрычніцкага РУУС жадае, каб вы хутчэй працаўладкаваліся. Афіцыйна. Спадзяюся, мяне ўсе пачулі. Інакш будзе вельмі кепска. У нас рычагоў уздзеяння на тых, хто не працуе, дастаткова», — казаў міліцыянер.
Яшчэ ён палохаў тых, хто будзе ігнараваць падобныя мерапрыемствы, адміністрацыйнымі працэсамі, і тады
«праз суд вы паедзеце, папрацуеце ў іншым месцы. Пасядзіце ў нас на ІЧУ без матраца».
Сілавік адзначыў, што многіх «дармаедаў» бачыць не першы раз, і дадаў, што не хоча, каб «прафілактычныя мерапрыемствы» былі масавымі.
«Таму вазьміце сябе за галаву. Мы з вас не злезем. Прымусім вас хадзіць ножкамі. Будзем потым мяняць дыслакацыю [сходаў]. Можа, дзе-небудзь на базе нейкага ЖЭСа зробім групавое выхаваўчае мерапрыемства. Вам гэта трэба? Ну, наступны раз, калі пахаладае — на вуліцы правядзём групавое выхаваўчае… каб памерзлі».
«Нават не суньце свае мабільныя тэлефоны»
Да аўдыторыі міліцыянт звяртаўся «паважаныя грамадзяне» і ўвесь час дадаваў рэмаркі кшталту «вы ж не занятыя нічым», «у вас вольнага часу мора». Суразмоўцу сталага веку ён паведаміў, што «ў ІЧУ ў нас — для тых, хто не ведае, — прымаюць да 74 гадоў. Але з пісьмовай маёй згоды і калі 75 — таксама можна закрыць». А таксама заявіў, што «на 100% упэўнены»: хтосьці прыйшоў на сход не зусім цвярозым «пасля ўчарашняга».
«А гэта кажа пра што? Што ён катэгарычна не паважае супрацоўнікаў органаў унутраных спраў. А мы вас паважаем», — зрабіў выснову ён.
Некаторыя з тых, хто прыйшоў, звярталіся з пытаннямі і расказвалі пра свае асабістыя сітуацыі. Мяркуючы па гэтых гісторыях — былі людзі, якія фактычна працуюць, але з-за нюансаў афармлення працягваюць лічыцца ў базе «не занятых у эканоміцы».
Сілавік на тых, хто афармляе самазанятасць, абрынуўся з крытыкай.
«Тыя хітраопыя (сілавік вымавіў гэтае слова менавіта так. — Заўв. «Люстэрка») паказваюць інспектарам — былі факты… Адкрываюць там гэтую самазанятасць, рэгіструюцца. Тыпу «я зарэгістраваўся, я ўжо ах*рэнна самазаняты чалавек». Усё гэта фэйк! Мы адкрываем базу Фонду сацыяльнай абароны. Калі там няма узносаў — гэта падман. Таму нават не суньце свае мабільныя тэлефоны».
«Такое, што «я не дажыву», — не пракатвае»
Нічыпар спрабаваў выбудаваць дыялог з залай, звяртаўся да канкрэтных людзей з пытаннямі. Але яму рэдка хтосьці адказваў.
«Я вас папрашу: не падводзьце сваіх блізкіх сваякоў. Я ўпэўнены, што вашы жонкі, мужы дзесьці добрасумленна працуюць… Там нейкія змены плануюцца ў аплаце камунальных паслуг. Не працуеш — будзеш плаціць 100%. Таму навошта плаціць 100%, калі можна ўладкавацца?
У кожнага, хто сядзіць тут, я ўпэўнены, напалову залатыя рукі. Чымсьці займаецеся карысным: зваршчыкам і гэтак далей. Таму можна працаўладкавацца на паўстаўкі і займацца сваёй любімай справай. Прыносіць даход. Яшчэ раз вас папрашу, запатрабую і прымушу вас падумаць пра працаўладкаванне», — намаўляў міліцыянер.
Заклікаў Нічыпар падумаць пра будучую пенсію, якой не хопіць нават на таблеткі.
— Вы ж зразумейце, 20 гадоў працоўнага стажу трэба. 20 гадоў! Каб атрымліваць хоць трохі нейкую больш-менш годную пенсію. А калі не будзе стажу, вы будзеце атрымліваць сацыяльную пенсію. Цяпер 241 рубель (245,55 рубля. — Заўв. «Люстэрка»), калі не памыляюся. Так? — удакладніў ён у кагосьці ў зале.
— Так-так-так, — пагадзіўся падказчык.
— 241 рубель! А вам будзе ўжо 63 [гады] плюс. Так? У мяне маці 300 рублёў толькі траціць на таблеткі. А ў вас пенсія будзе 241 рубель. Ну, пакуль пойдзеце [на пенсію] — 242 рублі будзе. А здароўе ўжо не тое. Ну, у любым выпадку нейкія медыцынскія прэпараты будзеце купляць. Такое, што «я не дажыву», — не пракатвае. Усе мы дажывём і будзем жыць шчасліва на пенсіі. Але… можа, нядоўга. А можа, і доўга.
Тым, хто маладзейшы, ён прапаноўваў падумаць пра дабрабыт бацькоў.
«За нашы з вамі падаткі бацькі атрымліваюць пенсію. Гэта значыць, вы сваёй маці або бацьку проста недаплачваеце тыя 200‑300 рублёў. [Падатак] 13 працэнтаў з заробку… Тысячу атрымліваеш — 130 рублёў у цябе вылічваюць на пенсію бацькам. Гэта значыць, вашай маці і бацьку вы 130 рублёў недаплачваеце. А яны добрасумленна, напэўна, працавалі ўвесь час».
«Будзем як у Эміратах хутка жыць! Гадоў праз дзесяць»
Не абышлося і без «палітінфармацыі».
— Вось хто глядзеў навіны? Параўналі даходы беларусаў, літоўцаў і палякаў. У іх там касмічныя заробкі. А калі пачалі вылічваць за сацыяльныя паслугі, дык і нядрэнна мы тут жывём! Цяпер прэзідэнт заявіў: самая танная электраэнергія — Беларусь, Расія, Казахстан.
— Медыцына бясплатная, — дадаў нехта з залы.
— Медыцына бясплатная, — падхапіў Нічыпар. — Плануюць трэцюю атамную… трэці блок на атамнай станцыі ў Астраўцы. У Магілёве закладваюць станцыю электрычную. Будзем як у Эміратах хутка жыць, гадоў праз дзесяць. Бясплатная электрычнасць будзе. Вось. Але калі будзеце так дрэнна сябе паводзіць, можаце трапіць туды на будоўлю. Рознарабочымі. Думайце, паважаныя.
У фінале размова павярнула ў нечаканы бок. Мабыць, міліцыянер вырашыў сумясціць сход па дармаедстве з прафілактыкай іншых правапарушэнняў.
«Я ўпэўнены, што тыя, каму да 30, яшчэ бацькі дзесьці працуюць, магчыма. І вы сядзіце ў іх на плячах. Сорам. Сорамна! Але апранаецеся добра. Значыць, у бацькоў бераце грошы. Або крадзеце.
Але тут як бы… Я думаю, што вы ведаеце: па горадзе Гродна ўсталяваныя камеры відэаназірання. Таму ўсе вашы крокі можна прасачыць. […] Выпадкова пакласці бутэльку ў кішэню і выйсці без грошай у краме … Выпадкова, так? Крадзеж. А калі прадаўцы крычаць «стой» — гэта рабаванне ўжо. […] Быццам бы бутэлька гарэлкі каштуе пяць рублёў, чакушачка, так? А гэта ў нас 206‑ы [артыкул]. Да трох гадоў пазбаўлення волі. У лепшым выпадку».
Яшчэ нейкі час Нічыпар паабмяркоўваў з людзьмі ў зале варыянты пакарання за крадзеж. А пасля, зрабіўшы выснову, што слухачы яго «пачулі, зразумелі», вырашыў заканчваць мерапрыемства і папрасіў уключыць дзяржаўны гімн.
«Дармаедаў» пачалі караць за няяўку на прафілактычныя мерапрыемствы
У гомельскай міліцыі расказалі, куды адпраўляюць працаваць «дармаедаў»
Як у Беларусі вышукваюць «дармаедаў» і чаго ад іх хочуць
Беспрацоўных ужо выклікаюць у міліцыю позвамі — чаму гэта незаконна
Праваслаўных святароў сталі прыцягваць да працы з «дармаедамі»
«Кожны месяц разглядаем паводзіны такіх грамадзян». У міліцыі расказалі, як змагаюцца з «дармаедамі»
Каментары
«праз суд вы паедзеце, папрацуеце ў іншым месцы. Пасядзіце ў нас на ІЧУ без матраца»."
а закон на гэта ё? а ну хаця, а пра што гэта я...