МЗС Літвы: Мэта Мінска — выйсці з ізаляцыі

Літва не паддасца палітычнаму шантажу, але гатовая да тэхнічнага дыялогу — прэзідэнт Літвы Гітанас Наўседа і міністр замежных справаў Кястуціс Будрыс афіцыйна адказалі беларускаму рэжыму на прапановы аб палітычным дыялогу, які фактычна стаў умовай шантажу — інакш беларускі рэжым адмаўляецца адпусціць фуры з краіны.

Кіраўнік літоўскай дыпламатыі Кястуціс Будрыс заявіў, што сапраўдная мэта Мінска — атрымаць кансультацыі на ўзроўні Міністэрстваў замежных справаў, каб выйсці з міжнароднай палітычнай ізаляцыі і дабіцца зняцця санкцый.

«Імкненні Беларусі адгадваюцца, некаторыя з іх вельмі канкрэтныя і вядомыя… Першая задача — змяніць, калі гаварыць наўпрост, пераламаць палітыку Еўрапейскага саюза адносна Беларусі і Расіі, якая з'яўляецца палітыкай міжнароднай ізаляцыі і адмовы размаўляць з рэжымам», — сказаў Будрыс.

Міністр падкрэсліў, што сам факт выхаду на палітычна-дыпламатычны ўзровень азначаў бы, што Беларусь «ужо зрабіла крок» да аднаўлення свайго месца ў міжнародных арганізацыях і зняцця санкцый, якія «вельмі балючыя для іх у эканамічным і фінансавым плане».

Літва лічыць, што ў выбары яе ў якасці мішэні ёсць пытанне не толькі аб двухбаковых адносінах, але і пытанне палітыцы ўсяго Еўрапейскага саюза.

«[Беларусь] спрабуе змяніць наша стаўленне і палітыку шантажом, такім жорсткім, бандыцкім спосабам», — дадаў ён.

Прэзідэнт Літвы Наўседа таксама заявіў, што Беларусь спрабуе ператварыць тэхнічныя пытанні ў палітычныя. Ён падкрэсліў, што Літва не будзе паддавацца такому ціску: «Літва, безумоўна, гатовая да супрацоўніцтва на тэхнічным узроўні ў пошуках рашэнняў. Мы не паддадзімся шантажу, але і не станем затыкаць вушы і зачыняць дзверы», — цытуе кіраўніка дзяржавы BNS.

Наўседа звярнуў увагу на тое, што дзеянні беларускіх уладаў могуць быць скаардынаваныя з Расіяй на фоне нявызначанасці вакол мірнага плану ЗША па Украіне: «Давайце зразумеем, што Беларусь — блізкі саюзнік Расіі, таму іх дзеянні, у тым ліку якія дэстабілізуюць, могуць быць скаардынаваныя. І чым больш нявызначанасці, чым больш шуму, тым больш выгадна гэтым агрэсіўным рэжымам».

Ён зноў назваў інцыдэнты з паветранымі шарамі і грузавікамі «тэхнічнымі пытаннямі, якія памежнікі з абодвух бакоў могуць вырашыць без праблем», і адзначыў, што няма неабходнасці ў «штучнай спробе абвастрыць сітуацыю».

У канцы кастрычніка Літва закрыла, а потым датэрмінова адкрыла памежныя пункты пропуску «Меднікі» і «Салечнікі» праз пагрозу кантрабандысцкіх паветраных шароў, якія літоўскія палітыкі лічаць гібрыднай атакай.

Беларускі бок, нягледзячы на адкрытую мяжу, дагэтуль не выпускае літоўскія грузавікі са сваёй тэрыторыі.

• 3
• 1
• 0
• 2
• 0
• 0
• 0
• 0