Расійскі комік, які ездзіў на Данбас, даў канцэрт у Мінску і пахабна пажартаваў пра Купалу
Дзяніс Дорахаў сабраў Палац спорту, але прынамсі адзін яго жарт гледачоў непрыемна здзівіў.
Дзяніс Дорахаў — даволі вядомы і папулярны ў Расіі комік. Ён іграў у КВЗ за каманду «Камызякі», з якой выступае дагэтуль. А яшчэ праславіўся дзякуючы шоу «Аднойчы ў Расіі».
У 2023 годзе Дорахаў разам са сваім пастаянным партнёрам у шоу Азаматам Мусагаліевым з'ездзіў на акупаваны Данбас. Там комікі выступілі перад расійскімі салдатамі, якія ваююць супраць Украіны.
«Мы пагутарылі непасрэдна з вайскоўцамі, якія абараняюць гэтую зямлю. І хачу сказаць пра галоўную асаблівасць: яны гавораць сэрцам, вельмі душэўныя людзі», — дзяліўся тады Дорахаў уражаннямі ад канцэрта.
Многія фанаты комікаў не зразумелі і сталі абвінавачваць іх у прадажнасці. Дзянісу нават давялося закрыць каментары пад допісам пра паездку.
25 лістапада Дорахаў даў вялікі сольны стэндап у Палацы спорту ў Мінску. Квіткі на канцэрт каштавалі ад 55 да 178 рублёў. Мяркуючы па ўсім, комік прасіў гледачоў не здымаць выступ. Але хтосьці ўсё ж такі не паслухаўся. І запосціў у тыкток яго вельмі дзіўны жарт пра Янку Купалу і Якуба Коласа.
Відаць, гэта быў пачатак канцэрта. Дорахаў вырашыў пахваліцца сваімі здольнасцямі і заявіў, што вывучыў правільную назву краіны, у якую прыехаў. А яшчэ зразумеў розніцу паміж беларускімі класікамі.
«Беларусь, не Белоруссія. Я падрыхтаваўся! Янка Купала — гэта пісьменнік, а не жонка Якуба Коласа. Які таксама пісьменнік. Я падрыхтаваўся!» — паспрабаваў пажартаваць Дорахаў.
Жарт, выглядае, не надта зайшоў беларускай аўдыторыі. Прагучалі вельмі рэдкія апладысменты, а рассмяяўся хіба што сам аўтар.
У каментарах такі гумар таксама не зразумелі. Людзі пытаюцца, дзе смяяцца, і цікавяцца, як увогуле за такое можна было заплаціць грошы. Вось толькі некалькі каментароў:
«Вось гэта ўзровень гумару…»
«Сам пажартаваў, сам пасмяяўся».
«Смяяцца пасля слова лапата?»
«Ціхі жах, жартаваць пра знакамітых беларускіх пісьменнікаў».
«Што смешнага ў знявазе нашых пісьменнікаў?»
«Калі гэта гумар, то я балерына. Проста сорамна».
Праўда, былі і тыя, каму канцэрт вельмі спадабаўся. Фанаты пішуць, што жарты былі смешныя, а каму не падабаецца, той проста нічога не разумее ў гумары.
Каментары