Чым страшнейшая кладзешся спаць, тым прыгажэйшая прачынаешся: модніцы апантаныя экстрэмальным начным доглядам
Кожную ноч тысячы дзяўчат кладуцца спаць, «муміфікаваныя» пластамі касметыкі і б'юці-сродкаў. Іх мэта — раніцай зняць з сябе ўсе «бінты» і ўбачыць у люстэрку ідэальны твар. Але ці працуе?
У тыктоку папулярны новы трэнд, які хаваецца пад хэштэгам #morningshed — складаныя працэдуры падрыхтоўкі сябе да сну, якія абяцаюць асляпляльны выгляд раніцай. Яны выходзяць далёка за межы нанясення звычайнай сыроваткі ці крэму. Галоўны прынцып можна сфармуляваць так: чым больш дзіўна і непрывабна выглядаеш перад сном, тым больш уражваючы будзе вынік раніцай.
Як піша El Pais, кожную раніцу тысячы дзяўчат прачынаюцца «муміямі» і трацяць час, каб пазбавіцца ад атрыбутаў свайго начнога рытуалу: некалькіх пластоў касметыкі, масак для твару і вуснаў, разнастайных патчаў, клейкай стужкі для фіксацыі рота і бандажоў для карэкцыі авала твару. Да ўсяго гэтага дадаецца стрэс ад неабходнасці спаць нерухома і на спіне.
Паводле звестак платформы для аналізу анлайн-трэндаў Spate, сярэднемесячная колькасць пошукаў па запыце #morningshed у гэтым годзе склала 3,6 мільёна. Іронія ў тым, што для дасягнення моднага «натуральнага» выгляду патрабуюцца каласальныя намаганні. Чым больш складаным і нават абсурдным выглядае начны рытуал, тым больш увагі ён прыцягвае ў сацсетках.
Ці такі добры эфект?
Маскі, патчы, бандажы… Дэрматолагі аднагалосна сцвярджаюць, што большая колькасць слаёў касметыкі не гарантуе лепшага выніку. Наадварот, многія з іх лічаць, што добра прадуманы мінімалізм значна больш эфектыўны. Шматэтапныя рытуалы, паводле іх слоў, могуць выклікаць раздражненне, кантактны дэрматыт, акнэ і парушэнне pH-балансу скуры.
Асабліва настойліва спецыялісты раяць не спалучаць рэтыноіды з хімічнымі пілінгамі. Рэтыноіды — гэта вельмі актыўныя вытворныя вітаміна А, якія паскараюць абнаўленне клетак, а хімічныя пілінгі (сродкі з AHA– і BHA-кіслотамі) інтэнсіўна ачышчаюць паверхню скуры. Выкарыстанне абодвух кампанентаў адначасова можа прывесці да моцнага раздражнення і пашкоджання ахоўнага бар'ера скуры, бо гэта занадта агрэсіўнае ўздзеянне. Таксама не рэкамендуецца спалучаць некалькі відаў пілінгаў за адну працэдуру, каб не выклікаць празмернае аблушчванне і абязводжванне скуры.
Вітамін С лепш засвойваецца раніцай, а рэтыноіды — увечары. Пептыды могуць страчваць сваю эфектыўнасць пры кантакце з моцнымі кіслотамі. Агульная рэкамендацыя — выкарыстоўваць адзін «магутны» актыўны кампанент за ноч у спалучэнні са сродкамі для аднаўлення скуры.
Сродкі без даказаных вынікаў
Поспех гэтых рытуалаў у сацыяльных сетках, здаецца, напрамую залежыць ад колькасці прадуктаў на твары. Аднак эфектыўнасць многіх з іх выклікае ў спецыялістаў вялікія сумневы.
Пластыр для рота, які нібыта забяспечвае правільнае насавое дыханне, дэрматолагі і медыкі лічаць небяспечнай практыкай. Яны папярэджваюць, што гэта можа выклікаць храп, апноэ і нават удушша, калі пластыр ссунецца падчас сну.
Эластычныя павязкі для твару з эфектам пахудзення на самой справе не змяншаюць тлушчавыя адклады. Яны даюць толькі часовы кампрэсійны эфект, а сон у іх можа выклікаць раздражненне і празмерную нагрузку на скронева-сківічны сустаў.
Клейкія стужкі для твару (тэйпы), якія нібыта прадухіляюць утварэнне маршчын, таксама не маюць даказанай эфектыўнасці, а рызыка пашкодзіць скуру пры іх зняцці цалкам рэальная.
Адна з самых дзіўных навінак — калагенавыя маскі, якія за ноч становяцца празрыстымі. Дэрматолагі тлумачаць, што касметычны калаген у яго звычайнай форме не здольны пранікнуць у глыбокія слаі скуры і дзейнічае толькі як часовы ўвільгатняльнік на паверхні. Для стымуляцыі выпрацоўкі ўласнага калагену патрэбныя іншыя кампаненты і працэдуры.
Акрамя таго, эксперты па касметыцы нагадваюць пра важнае правіла бяспекі: неабходна заўсёды прытрымлівацца інструкцый вытворцы і не пакідаць на ўсю ноч маску, якая для гэтага не прызначана. Яны ўдакладняюць, што калі маска з'яўляецца пілінгам або мае ў саставе кіслоты (напрыклад, гліколевую, малочную ці саліцылавую), пакідаць яе на ноч вельмі небяспечна. Гэта можа выклікаць моцнае раздражненне, пачырваненне і пашкоджанне ахоўнага бар'ера скуры, бо такія сродкі разлічаны на ўздзеянне ўсяго на некалькі хвілін.
У той жа час, калі маска мае ўвільгатняльны або заспакаяльны эфект і змяшчае такія кампаненты, як гіалуронавая кіслата або алоэ вера, працяглае выкарыстанне звычайна не выклікае праблем.
Дык які ж начны догляд лічыцца ідэальным?
На думку касметолагаў, эфектыўны начны рытуал складаецца ўсяго з некалькіх правільна падабраных крокаў: дбайнага двухэтапнага ачышчэння, выкарыстання актыўных кампанентаў (такіх як рэтыноіды і пептыды) для аднаўлення і дастатковага ўвільгатнення для падтрымання ахоўнага бар'ера скуры.
Цяпер чытаюць
Чаму YouTube выдаліў каналы БелТА, СТБ і АНТ? Вось што вядома25
Каментары