У Магілёве дзяўчына спагнала грошы з падлетка, праз якога яна ўпала на эскалатары
Непрыемны выпадак адбыўся ў маі 2025 года. Дзяўчына ехала на эскалатары на другі паверх гандлёвага цэнтра, калі падлетак, які стаяў перад ёй вышэй, раптам страціў раўнавагу і пачаў падаць. Ён збіў дзяўчыну з ног, і абодва скаціліся ўніз па эскалатары.
Пасля падзення пацярпелая адчула моцны боль у вобласці левага пляча, яе машынай хуткай дапамогі даставілі ў траўматалагічны пункт.
Судова-медыцынская экспертыза ўстанавіла, што ў дзяўчыны быў закрыты пералом лапатачнага канца левай ключыцы, а таксама сінякі і драпіны.
Падчас праверкі высветлілася, што прычынай здарэння сталі дзеянні 14‑гадовага падлетка. Ён рухаўся ўніз па сустрэчным эскалатары і, убачыўшы, што насустрач едуць знаёмыя, схапіў аднаго з іх за шыю ў знак прывітання. Хлопец ад нечаканасці страціў раўнавагу і пачаў падаць, збіўшы і дзяўчыну.
Пацярпелая падала пазоў у суд Ленінскага раёна Магілёва, жадаючы атрымаць кампенсацыю маральнай шкоды з падлетка, яго законных прадстаўнікоў, а таксама з уласніка эскалатара. Яна адзначыла, што доўгі час была на бальнічным, не магла паўнавартасна вучыцца і працаваць над дыпломам — а была студэнткай выпускнога курса. Памер маральнай шкоды яна ацаніла ў 25 тысяч рублёў.
Разгледзеўшы матэрыялы справы, суд прыйшоў да высновы, што падзенне адбылося менавіта з-за неасцярожных дзеянняў падлетка, які схапіў знаёмага за шыю. У выніку было прынята рашэнне спагнаць з яго на карысць дзяўчыны 7 тысяч рублёў кампенсацыі маральнай шкоды, а пры адсутнасці даходаў у яго самога — з ягоных законных прадстаўнікоў.
Пракуратура пра смерць Мелказёрава: журналіст меў хранічную хваробу17
Каментары