Грамадства1515

З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»

Раней адмовіліся ад «Прафсаюзнай» на праспекце Пераможцаў.

Фота ілюстрацыйнае

У планах развіцця сталічнага метрапалітэна адбыліся істотныя змены: чацвёртая лінія, якая павінна стаць кальцавой, засталася без дзвюх станцый. Хоць пра гэта афіцыйна не паведамлялася, пра скарачэнне праекта сведчыць новая схема развіцця мінскага метро.

Першапачаткова на будучай чацвёртай лініі мінскага метрапалітэна планавалі пабудаваць 17 станцый, 6 з якіх мусілі стаць перасадачнымі на станцыі іншых ліній. У 2018 годзе Мінгарвыканкам нават зацвердзіў афіцыйныя назвы ўсіх станцый кальцавой лініі.

Аднак у свежым артыкуле газеты «СБ. Беларусь сегодня», прысвечаным развіццю транспартнай сеткі, гаворка ідзе ўжо толькі пра 15 станцый. Пры гэтым дзяржаўнае выданне не акцэнтуе ўвагі на тым, што з праекта былі выключаны дзве станцыі. 

Абноўленая схема развіцця мінскага метрапалітэна. Фота: СБ. Беларусь сегодня

Новая схема развіцця сталічнага метро, прыкладзеная да артыкула, дае зразумець, што з праекта чацвёртай лініі зніклі станцыі «Кіеўскі сквер» і «Політэхнічная».

Станцыю метро «Кіеўскі сквер» планавалі ўзвесці на скрыжаванні вуліц Арлоўскай і Гая, на ўчастку паміж станцыямі «Максіма Багдановіча» (перасадка на станцыю «Парк Дружбы народаў» трэцяй лініі) і «Старавіленскі шлях».

Другая, «Політэхнічная», павінна была з'явіцца на скрыжаванні вуліц Сурганава і Якуба Коласа — паміж станцыямі «Максіма Багдановіча» і «Друкарская» (перасадка на «Акадэмію навук»).

Як змяняліся планы

Ранейшая схема развіцця мінскага метрапалітэна са станцыямі «Кіеўскі сквер» і «Політэхнічная» на чацвёртай кальцавой лініі

Яшчэ ў маі 2025 года галоўны інжынер прадпрыемства «Сталічны транспарт і сувязь» Андрэй Іларыёнаў казаў пра тое, што чацвёртая лінія будзе складацца з 17 станцый. Але ўжо ў кастрычніку галоўны інжынер «Мінскметрапраекта» Георгій Пратасаў паведаміў, што на лініі застанецца толькі 16 станцый, не ўдакладняючы, ад якой менавіта адмовіліся.

Відаць, першай «ахвярай» стала станцыя «Кіеўскі сквер». Са слоў Пратасава вынікала, што на першым участку — ад «Максіма Багдановіча» да «Тучынкі» — плануюць пабудаваць шэсць станцый, хоць згодна з ранейшымі схемамі іх там было сем. 

Тады ж, у кастрычніку 2025 года, прэс-сакратар Мінскага метрапалітэна Андрэй Дроб пацвердзіў, што праект чацвёртай лініі яшчэ дапрацоўваецца. Паводле яго слоў, паўночны і заходні ўчасткі ўжо пралічаныя, і новая лінія, хутчэй за ўсё, не будзе дакладна супадаць з другім транспартным кальцом, як меркавалася раней.

Супярэчлівыя планы

Паведамляецца, што падрыхтоўка да будаўніцтва чацвёртай лініі пачнецца ўжо ў наступным годзе, а першы ўчастак пойдзе менавіта ад станцыі «Максіма Багдановіча» ў бок Вяснянкі. Пры гэтым першая ж пасля перасадачнага вузла запланаваная станцыя — «Кіеўскі сквер» — будзе прапушчана. Наступнай станцыяй, якую пачнуць будаваць пасля станцыі «Максіма Багдановіча», стане адразу «Старавіленскі шлях».

Цяпер у раёне скрыжавання вуліц Арлоўскай і Гая, дзе мелася быць станцыя «Кіеўскі сквер», дамінуе сядзібная забудова, што магло б паслужыць фармальным апраўданнем для «аптымізацыі».

Аднак горадабудаўнічыя планы на гэты раён робяць гэтае рашэнне нелагічным. Згодна з прэзентаваным летась дэтальным планам (ПДП), гэтую тэрыторыю чакае радыкальная рэканструкцыя. Замест сядзібнай забудовы ўздоўж пашыранай магістралі Арлоўскай вырастуць шматпавярховікі, паркінгі і шматфункцыянальныя цэнтры. У выніку насельніцтва раёна вырасце з 7 тысяч да амаль 12 тысяч чалавек. Выглядае на тое, што жыхары новага раёна застануцца без абяцанага метро.

Гэта ўжо не першы выпадак скарачэння праектаў ліній мінскага метрапалітэна. Раней стала вядома пра адмену станцыі «Прафсаюзная» на трэцяй лініі, якую планавалі пабудаваць каля скрыжавання Мельнікайтэ і праспекта Пераможцаў. Тады гарадскія ўлады патлумачылі гэта «пераглядам мэтазгоднасці» і блізкасцю суседніх станцый.

«Наша Нiва» — бастыён беларушчыны

ПАДТРЫМАЦЬ

Каментары15

  • СТАНЦЫЯ "Прэзідэнцкая"
    17.01.2026
    Асцярожна, дзверы зачыняюцца - наступная станцыя "Мikкалаеўская"
  • А
    17.01.2026
    Няма грошай, але вы трымайцеся!
  • %
    17.01.2026
    ДенЬгаФ няма

Цяпер чытаюць

Паўла Муравейку, які адпрацаваў намеснікам у Адміністрацыі Лукашэнкі толькі паўтара месяца, перавялі ў кіраўнікі Віцебшчыны18

Паўла Муравейку, які адпрацаваў намеснікам у Адміністрацыі Лукашэнкі толькі паўтара месяца, перавялі ў кіраўнікі Віцебшчыны

Усе навіны →
Усе навіны

Штодзённая кава стымулюе кішэчнік і зніжае рызыку Паркінсона. Каб даказаць гэта, правялі незвычайны эксперымент5

Эстонія закрывае мяжу з Расіяй з 1 снежня. Прычынай стала спроба ГРУ падпаліць абаронны завод 19

Пяць краін ЕС адкрываюць у Руандзе лагер для дэпартаваных мігрантаў. Раней Брытанія страціла на падобнай схеме амаль мільярд даляраў6

Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал27

У Мінску адкрылі новую дыспетчарскую станцыю замест знесенай савецкай. Але будынка там няма — толькі бытоўка і біятуалет1

У Беларусі за апошнія гады ліквідавалі 40 праваслаўных прыходаў5

Украінскія дроны не могуць дагнаць рэактыўныя «Шахеды». У SpaceX кажуць пра тэхнічны збой3

«А як ты выкупіў адразу акцэнт?» Рэпер Баста па голасе пазнаў музыканта з Чавусаў і расказаў пра сваё дзяцінства ў закрытым гарадку пад Дзятлавам8

Амаль 400‑метровы пуцеправод паміж Каменнай Горкай і Лебядзіным абяцаюць адкрыць да канца года2

больш чытаных навін
больш лайканых навін

Паўла Муравейку, які адпрацаваў намеснікам у Адміністрацыі Лукашэнкі толькі паўтара месяца, перавялі ў кіраўнікі Віцебшчыны18

Паўла Муравейку, які адпрацаваў намеснікам у Адміністрацыі Лукашэнкі толькі паўтара месяца, перавялі ў кіраўнікі Віцебшчыны

Галоўнае
Усе навіны →

Заўвага:

 

 

 

 

Закрыць Паведаміць