Z prajekta budaŭnictva minskaha mietro vykinuli jašče dźvie stancyi — «Kijeŭski skvier» i «Politechničnuju»

U płanach raźvićcia staličnaha mietrapalitena adbylisia istotnyja źmieny: čaćviortaja linija, jakaja pavinna stać kalcavoj, zastałasia bieź dźviuch stancyj. Choć pra heta aficyjna nie paviedamlałasia, pra skaračeńnie prajekta śviedčyć novaja schiema raźvićcia minskaha mietro.

Pieršapačatkova na budučaj čaćviortaj linii minskaha mietrapalitena płanavali pabudavać 17 stancyj, 6 ź jakich musili stać pierasadačnymi na stancyi inšych linij. U 2018 hodzie Minharvykankam navat zaćvierdziŭ aficyjnyja nazvy ŭsich stancyj kalcavoj linii.

Adnak u śviežym artykule haziety «SB. Biełaruś siehodnia», pryśviečanym raźvićciu transpartnaj sietki, havorka idzie ŭžo tolki pra 15 stancyj. Pry hetym dziaržaŭnaje vydańnie nie akcentuje ŭvahi na tym, što z prajekta byli vyklučany dźvie stancyi. 

Pavialičyć

Novaja schiema raźvićcia staličnaha mietro, prykładzienaja da artykuła, daje zrazumieć, što z prajekta čaćviortaj linii źnikli stancyi «Kijeŭski skvier» i «Politechničnaja».

Stancyju mietro «Kijeŭski skvier» płanavali ŭźvieści na skryžavańni vulic Arłoŭskaj i Haja, na ŭčastku pamiž stancyjami «Maksima Bahdanoviča» (pierasadka na stancyju «Park Družby narodaŭ» treciaj linii) i «Staravilenski šlach».

Druhaja, «Politechničnaja», pavinna była źjavicca na skryžavańni vulic Surhanava i Jakuba Kołasa — pamiž stancyjami «Maksima Bahdanoviča» i «Drukarskaja» (pierasadka na «Akademiju navuk»).

Jak źmianialisia płany

Pavialičyć

Jašče ŭ mai 2025 hoda hałoŭny inžynier pradpryjemstva «Staličny transpart i suviaź» Andrej Iłaryjonaŭ kazaŭ pra toje, što čaćviortaja linija budzie składacca z 17 stancyj. Ale ŭžo ŭ kastryčniku hałoŭny inžynier «Minskmietraprajekta» Hieorhij Pratasaŭ paviedamiŭ, što na linii zastaniecca tolki 16 stancyj, nie ŭdakładniajučy, ad jakoj mienavita admovilisia.

Vidać, pieršaj «achviaraj» stała stancyja «Kijeŭski skvier». Sa słoŭ Pratasava vynikała, što na pieršym učastku — ad «Maksima Bahdanoviča» da «Tučynki» — płanujuć pabudavać šeść stancyj, choć zhodna z raniejšymi schiemami ich tam było siem. 

Tady ž, u kastryčniku 2025 hoda, pres-sakratar Minskaha mietrapalitena Andrej Drob paćvierdziŭ, što prajekt čaćviortaj linii jašče dapracoŭvajecca. Pavodle jaho słoŭ, paŭnočny i zachodni ŭčastki ŭžo praličanyja, i novaja linija, chutčej za ŭsio, nie budzie dakładna supadać z druhim transpartnym kalcom, jak mierkavałasia raniej.

Supiarečlivyja płany

Paviedamlajecca, što padrychtoŭka da budaŭnictva čaćviortaj linii pačniecca ŭžo ŭ nastupnym hodzie, a pieršy ŭčastak pojdzie mienavita ad stancyi «Maksima Bahdanoviča» ŭ bok Viaśnianki. Pry hetym pieršaja ž paśla pierasadačnaha vuzła zapłanavanaja stancyja — «Kijeŭski skvier» — budzie prapuščana. Nastupnaj stancyjaj, jakuju pačnuć budavać paśla stancyi «Maksima Bahdanoviča», stanie adrazu «Staravilenski šlach».

Ciapier u rajonie skryžavańnia vulic Arłoŭskaj i Haja, dzie miełasia być stancyja «Kijeŭski skvier», daminuje siadzibnaja zabudova, što mahło b pasłužyć farmalnym apraŭdańniem dla «aptymizacyi».

Adnak horadabudaŭničyja płany na hety rajon robiać hetaje rašeńnie niełahičnym. Zhodna z prezientavanym letaś detalnym płanam (PDP), hetuju terytoryju čakaje radykalnaja rekanstrukcyja. Zamiest siadzibnaj zabudovy ŭzdoŭž pašyranaj mahistrali Arłoŭskaj vyrastuć šmatpaviarchoviki, parkinhi i šmatfunkcyjanalnyja centry. U vyniku nasielnictva rajona vyraście z 7 tysiač da amal 12 tysiač čałaviek. Vyhladaje na toje, što žychary novaha rajona zastanucca biez abiacanaha mietro.

Heta ŭžo nie pieršy vypadak skaračeńnia prajektaŭ linij minskaha mietrapalitena. Raniej stała viadoma pra admienu stancyi «Prafsajuznaja» na treciaj linii, jakuju płanavali pabudavać kala skryžavańnia Mielnikajte i praśpiekta Pieramožcaŭ. Tady haradskija ŭłady patłumačyli heta «pierahladam metazhodnaści» i blizkaściu susiednich stancyj.

• 0
• 0
• 6
• 5
• 1
• 1
• 3
• 0