У расійскіх універсітэтах вырашылі адмовіцца ад звыклай сістэмы бакалаўрыяту і магістратуры і перайсці на новую мадэль вышэйшай адукацыі.
Пачынаючы з наступнага навучальнага года атрымаць ступень бакалаўра або магістра ў расійскіх ВНУ будзе немагчыма. Замест бакалаўрыяту ўводзіцца так званая базавая вышэйшая адукацыя, якая будзе доўжыцца ад чатырох да шасці гадоў у залежнасці ад спецыяльнасці. Магістратуру заменіць спецыялізаваная вышэйшая адукацыя працягласцю ад аднаго да трох гадоў.
Як растлумачыла першая намесніца старшыні камітэта Дзярждумы РФ па навуцы і вышэйшай адукацыі Ксенія Гарачава, фактычна гаворка ідзе пра абноўлены фармат магістратуры з рознымі напрамкамі — прафесійным, кіраўнічым і даследчым.
Яшчэ адно істотнае новаўвядзенне — паступаць на бюджэтныя месцы на спецыялізаваную вышэйшую адукацыю змогуць выпускнікі любых базавых праграм. Аспірантуру ж плануюць вылучыць у асобны ўзровень прафесійнай адукацыі.
Гэтую мадэль, якая прыйшла на змену Балонскай сістэме, у Расіі выпрабоўвалі з 2022 года ў шасці ўніверсітэтах. Цяпер улады вырашылі распаўсюдзіць яе на большую колькасць ВНУ краіны.
Студэнты, якія паступілі ва ўніверсітэты раней, працягнуць навучанне па старых правілах. Змены закрануць толькі тых, хто будзе паступаць у 2026 годзе, а пераход на новую сістэму адбудзецца паступова.
Каментары