Трамп пагражае тарыфамі краінам, якія пастаўляюць нафту на Кубу

Прэзідэнт ЗША Дональд Трамп выдаў указ, якім зрабіў магчымым увядзенне дадатковых пошлін на тавары з краін, якія пастаўляюць нафту на Кубу. У пачатку студзеня ЗША захапілі венесуэльскага лідара і саюзніка Гаваны Нікаласа Мадура, і Трамп намякаў, што Куба можа стаць яго наступнай мэтай, піша Бі-бі-сі.

«Урад Кубы працягвае ўяўляць пагрозу нацыянальнай бяспецы Злучаных Штатаў. Мы не дазволім замежным дзяржавам падтрымліваць гэты рэжым, даючы яму жыццёва важныя энергарэсурсы. Адгэтуль любая краіна, якая пастаўляе нафту ў Гавану, сутыкнецца з эканамічнымі наступствамі ў выглядзе тарыфаў на свае тавары пры ўвозе ў ЗША», — гаворыцца ў заяве Белага дома.

Прапанаваныя новыя пошліны выкладзены ў прэзідэнцкім указе, але ў ім не ўдакладняецца ні ўзровень магчымых тарыфаў, ні пералік краін, якія могуць трапіць пад абмежаванні.

Дональд Трамп неаднаразова пагражаў прыняць меры супраць Кубы і яе камуністычнага кіраўніцтва. Раней амерыканскі прэзідэнт заклікаў Кубу «пайсці на здзелку, пакуль не позна», але не ўдакладняў ні яе ўмоў, ні магчымых наступстваў для дзяржавы.

У адказ прэзідэнт Кубы Мігель Дыяс-Канель заявіў, што Вашынгтон не мае маральнага права навязваць яго краіне якія-небудзь дамоўленасці.

Новая мера сведчыць аб узмацненні рыторыкі Трампа ў адносінах да Кубы, і ўказ у значнай ступені накіраваны супраць Мексікі, якая ў апошнія гады пастаўляла на Кубу дзясяткі тысяч барэляў нафты ў суткі.

Раней Трамп заяўляў, што, на яго думку, Куба «блізкая да калапсу і на мяжы таго, каб абрынуцца» пасля спынення нафтавых паставак з Венесуэлы.

Венесуэла была асноўным пастаўшчыком нафты на Кубу, накіроўваючы, паводле ацэнак спецыялістаў, каля 35000 барэляў (каля 4,8 тыс. тон) нафты ў дзень, але экспарт спыніўся яшчэ ў снежні з-за марской блакады Венесуэлы з боку ЗША. Апошні танкер з нафтай быў адпраўлены на Кубу ў сярэдзіне снежня, паведамляе Reuters са спасылкай на ўнутраныя дакументы PDVSA, дзяржаўнай нафтагазавай кампаніі Венесуэлы.

Недахоп паліва ўжо некалькі гадоў моцна б'е па эканоміцы Кубы. У апошнія гады востраў жыве ва ўмовах пастаянных адключэнняў электрычнасці і інтэрнэту, а таксама дэфіцыту базавых прадуктаў. Па падліках кубінскага дэмографа, насельніцтва краіны ў апошнія гады знізілася на 18% з-за эміграцыі, і з'язджаюць у першую чаргу маладыя людзі.

Акрамя таго, Трамп заявіў, што «палітыка, практыка і дзеянні ўрада Кубы ўяўляюць сабой незвычайную і надзвычайную пагрозу» і абвінаваціў Гавану ў размяшчэнні «небяспечных праціўнікаў Злучаных Штатаў».

Ва ўказе сцвярджаецца, што на Кубе «размешчаны найбуйнейшы замежны аб'ект радыёэлектроннай разведкі Расіі, які спрабуе выкрасці канфідэнцыйную інфармацыю аб нацыянальнай бяспецы Злучаных Штатаў», а таксама згадваюцца сувязі вострава з тым, што ва ўказе названы «варожымі ў адносінах да ЗША зламыснымі суб'ектамі», у прыватнасці з Кітаем, Іранам, ХАМАС і «Хезбалой».

Новы ўказ Трампа кубінскія ўлады пакуль не пракаментавалі.

На пытанне, ці ставіць перад сабой указ мэту «перакрыць кісларод» Кубе, Трамп зноў адказаў, што Куба ўяўляе сабой дзяржаву, якая не адбылася.

«Не ведаю, слова «задушыць» жудасна жорсткае. Куба — гэта дзяржава, якая церпіць крах. Не, я не спрабую [зрабіць гэта]. Але падобна, што яна проста не зможа выжыць», — сказаў Трамп.

• 0
• 0
• 0
• 0
• 0
• 0
• 0
• 0