Сёння Мінск прачнуўся ўначы ад моцнага гуку, падобнага да дрона

Ранкам 23 сакавіка жыхары розных гарадоў Беларусі пачалі масава пісаць у Трэдс пра дзіўны гук у небе, які яны чулі ноччу. Першымі пра гэта загаварылі мінчукі, але хутка ў сацсетках пачалі адгукацца людзі з іншых месцаў.

Многія адзначаюць, што прачнуліся каля другой-трэцяй гадзіны ночы.

@nashaniva Ноччу ў Мінску людзей разбудзіў незвычайны гук. Што гэта было? #Мчсбеларуси #беларусьновости #минск #минсксейчас #новостибеларуси ♬ Mystery / Suspense Investigation / Investigation / Thinking(1179817) - DaikixCousin

Мінчукі пішуць, што дзіўны гук чулі ў раёне Каменнай Горкі, Глебкі, Кунцаўшчыны, Уручча, Лябяжага, Акадэміі навук, парка Чалюскінцаў, Камароўкі, Багдановіча і Веры Харужай. Часцей за ўсё называўся час каля другой ночы.

Адна з мінчанак пісала: «Сёння ноччу прачнулася ад гуку беспілотніка за акном. Каменная Горка, хто яшчэ чуў?»

Іншая ўдакладняла: «У 2:01 ляцеў над домам на Глебкі». Яшчэ адна жанчына дадала: «Цэнтральны раён, вельмі гучны і нарастаючы гук».

Хтосьці пісаў больш эмацыйна: 

«Я наўпрост падарвалася ў 2:00 на парку Чалюскінцаў, здавалася проста каля акна».

«Акадэмія навук. Думала, што ўжо трэба хавацца ў бамбасховішча».

«Вуліца Кунцаўшчына. 02:19. Чулі, сабака разбудзіў нас. Вельмі афігелі», — адзначылі ў каментарах.

Некаторыя каментатары ўпэўненыя, што гэта дакладна не верталёт і не самалёт. «Цэнтральны раён, 2 гадзіны ночы. Ніколі такога гуку не чула раней. Дакладна не мапед, і не верталёт, і не самалёт», — напісала адна з карыстальніц.

Іншая дадавала: «Гэта не верталёт і не матацыкл. Каты таксама ўсе паднялі галовы і здранцвелі, прыслухоўваючыся».

Былі і тыя, хто спрабаваў знайсці больш побытавае тлумачэнне. У сацсетках з’явілася версія, што над Мінскам уначы лётаў верталёт МНС. Раней «Мінскэнерга» паведамляла, што ў сталіцы з 11 сакавіка па 5 красавіка авіяцыя МНС будзе дапамагаць спецыялістам «Мінскіх цеплавых сетак» шукаць пашкоджанні труб, ізаляцыі і затапленні камер.

Адна з карыстальніц напісала: «Над Інстытутам культуры ўжо дзякуй богу адлятаў. З 3 ночы кружыў гэты верталёт. Павольна, нізка, нудна. Уначы. Сканіраванне цеплатрас, кожны год так».

Але ў каментарах шмат хто пісаў, што гук усё ж не падобны. Да таго ж пра падобныя гукі паведамлялі і з іншых гарадоў Беларусі.

Напрыклад, з Оршы прыйшло вельмі канкрэтнае апісанне: «У оршы таксама былі гукі, з 2:30 да 3 дакладна. Думаў верталёт ляціць, альбо мне падалося. Але амаль уся Беларусь піша, значыць, не падалося. Кажуць, што гэта гукі беспілотніка».

У Магілёве таксама пісалі пра начны гук. У адным з каментароў сказана: «Магілёў, было чуваць, каля 1:40 ночы і крыху страшна».

У каментарах з Баранавічаў сцвярджаюць: «У Баранавічах падарвалася, ляцеў знішчальнік ці хто з такім гукам, што думала ўсё, у наш дом…. Ужо развіталася з усімі. Вельмі гучна было».

«Наша Ніва» спрабавала датэлефанавацца ў прыёмныя службаў МНС у Мінску, але на момант публікацыі зрабіць гэта не ўдалося.

• 0
• 0
• 2
• 0
• 3
• 0
• 7
• 0