Зорка Нацыянальнай хакейнай лігі паразважаў пра магчымае завяршэнне кар'еры.
Форвард «Вашынгтона» Аляксандр Авечкін зноў падкрэсліў, што пакуль не ведае, што чакае яго ў будучыні пасля заключнага матча рэгулярнага сезона, што прайшоў гэтай ноччу. Аднак 40‑гадовы расіянін даў зразумець, што гэта можа быць не канец яго кар’еры ў НХЛ, паведамляе афіцыйны сайт лігі.
«Вашынгтон», за які таксама выступаюць двое беларусаў — браты Аляксей і Ілля Протасы, не трапіў у розыгрыш Кубку Стэнлі, фінішаваўшы ва Усходняй канферэнцыі на 9‑м месцы.
«Спадзяюся, што гэта не мой апошні матч, — сказаў Авечкін пасля таго, як аддаў галявую перадачу на пераможны гол Якаба Чыхруна ў большасці на 15:53 трэцяга перыяду. — Я не ведаю, што будзе далей. Пабачым».
Адна з інтрыгаў гэтага сезона была ў тым, ці паб'е Авечкін вечны рэкорд Уэйна Грэцкі па галах у НХЛ (рэгулярны чэмпіянат + Кубак Стэнлі). Зараз у Грэцкі, які скончыў кар'еру ў 1999 годзе, 1016 шайбаў, у Авечкіна — 1006. У сезоне 2024‑2025 расіянін дагнаў канадца па шайбах у рэгулярным чэмпіянаце без уліку Кубка Стэнлі. Шанец дагнаць быў гэтай вясной, каб «Вашынгтон» трапіў у Кубак Стэнлі.
«Сезон скончаны, — сказаў Авечкін. — Вядома, не хацелася заканчваць так, але гэта вопыт для маладых гульцоў. … Думаю, адказнасць на нас, і ўчорашні дзень быў не найлепшым сцэнарыем і для нас, і для «Калумбуса» [таксама не трапіў у Кубак Стэнлі — НН]
Нягледзячы на адсутнасць турнірнай вагі, шмат заўзятараў прыехалі з Вашынгтона, каб, магчыма, у апошні раз убачыць Авечкіна. Яны трымалі плакаты «THX OVI» [Дзякуй, Ові — НН] і «One more year!».
У канцы трэцяга перыяду фанаты скандавалі гэтыя словы, а пасля фінальнай сірэны — «О-ві! О-ві!». Авечкін у адказ паапладзіраваў ім у пальчатках перад тым, як сысці ў распранальню.
«Я не ведаю, што будзе, — сказаў ён. — Фанаты, якія прыехалі з Вашынгтона і іншых месцаў, — гэта вельмі прыемна. Я чуў іх падтрымку і крыкі «Яшчэ адзін год!». Гэта важна. Гэта паказвае вялікую павагу. Дзякуй за падтрымку».
Авечкін правёў усю сваю кар’еру ў НХЛ у складзе «Кэпіталз», якія выбралі яго пад першым нумарам драфта 2004 года. Ён стаў тварам клуба і ў 2018 годзе прывёў каманду да першага Кубка Стэнлі.
У гэтым сезоне ён зноў згуляў усе 82 матчы (пяты раз у кар’еры) і стаў найлепшым бамбардзірам каманды — 32 галы і 64 балы. Трэнер Спенсэр Карберы нават пакінуў яго на лёдзе ў апошнія 1:49, каб ён мог забіць у пустыя вароты, але шайба не ўляцела.
«Мне хацелася, каб ён, калі гэта апошні матч, завяршыў яго яшчэ адным голам, — сказаў Карберы. — Шанец быў, але шайба падскоквала».
У распранальні таксама абмяркоўвалася будучыня Авечкіна, але дэталі не раскрываюцца.
Том Уілсан адзначыў, што Авечкін стараецца не прыцягваць да сябе ўвагі: «Ён робіць усё, каб усё выглядала звычайна. Ён не кажа нам, што плануе».
Сам 40‑гадовы Авечкін паведаміў, што першы этап прыняцця рашэння — сустрэчы пасля сезона. Ён таксама будзе раіцца з кіраўніцтвам клуба і сям’ёй.
«Мы яшчэ крыху пабудзем у Вашынгтоне. Не ведаю, калі паляцім дадому, магчыма, у маі», — сказаў ён.
Сімвалічна, што, калі гэта быў яго апошні матч, ён адбыўся супраць «Каламбус Блю Джэкетс» — менавіта супраць гэтай каманды Авечкін дэбютаваў у НХЛ 5 кастрычніка 2005 года і адразу закінуў дзве шайбы.
З таго часу ён пераўзышоў рэкорд Уэйна Грэцкі (894 шайбы), усталяваўшы новы — 929 (у рэгулярных чэмпіянатах). У плэй-оф у яго 77 галоў, у тым ліку 15 у чэмпіёнскім 2018 годзе, калі ён атрымаў прыз MVP.
У суме ў яго 1006 галоў — усяго на 10 менш за агульны рэкорд Грэцкі (1016).
Судзячы па яго форме ў гэтым сезоне, ён мог бы пабіць і гэты рэкорд, калі працягне кар’еру.
«Ён — найлепшы снайпер усіх часоў, — сказаў былы форвард «Кэпіталз» Т. Дж. Ошы. — Калі ён вернецца, думаю, лёгка заб’е 30, а можа і 40, бо ён проста ўмее забіваць».
Каментары