Дарадца Ціханоўскай заклікаў узяць удзел у выбарах у Каардынацыйную раду
Старшы палітычны дарадца Святланы Ціханоўскай Аляксандр Дабравольскі апублікаваў зварот да беларусаў з просьбай галасаваць на выбарах у Каардынацыйную раду, якія пачынаюцца 11 мая ўвечары.
На думку Дабравольскага, рэжым Лукашэнкі баіцца выбараў у Каардынацыйную раду і таму «намагаецца запужаць нас». Ён адзначае, што «перадвыбарчая кампанія праходзіла ва ўмовах павялічанага ціску — прызнанне кандыдатаў экстрэмістамі, кібератакі і інфармацыйныя напады», і гэта, маўляў, «дадаткова сведчыць аб важнасці выбараў у КР для Беларусі».
«Ніводны з тых, хто галасаваў на выбарах у Каардынацыйную раду два гады таму, не быў выкрыты і пакараны за гэта. За два гады рэжым не змог узламаць IT-сістэмы і атрымаць доступ да ідэнтыфікацыі выбарцаў. Менавіта таму ўсё, што рэжыму застаецца — гэта рабіць укіды і застрашаць людзей. Але досвед выбараў дае нам падставы для ўпэўненасці ў тым, што на сёння зроблена ўсё магчымае для забеспячэння бяспекі тых, хто будзе браць удзел у галасаванні», — сцвярджае Аляксандр Дабравольскі.
Акрамя таго, ён заяўляе, што «Каардынацыйная рада — наш протапарламент. Гэта тая прастора, дзе можна і трэба абмяркоўваць нашыя праблемы і выпрацоўваць інструменты іх вырашэння». Выбары ж у яе «важныя яшчэ і таму, што яны вяртаюць нам сам сэнс выбару».
«Таму ўдзел у гэтым галасаванні — гэта не толькі выбар прадстаўнікоў, але і захаванне самой культуры дэмакратычнага выбару для будучай Беларусі», — упэўнены Аляксандр Дабравольскі.
Кампанія Sumsub, задзейнічаная ў апрацоўцы пашпартоў беларусаў, якія галасуюць на выбарах у КР, адрэагавала на публікацыю «НН»
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне
Выбары ў Каардынацыйную раду перанясуць амаль на дзень
Дачка Вардамацкага вырашыла не балатавацца ў Каардынацыйную раду
Каментары