У Ратамцы ў красавіку прадалі самую дарагую кватэру ў Мінскай вобласці
Жылы комплекс «Пірс» у свой час лічыўся адным з самых смелых праектаў на рынку нерухомасці Беларусі. Гэты квартал каля Мінскага мора стаў першым закрытым клубным пасёлкам за межамі сталіцы. Менавіта тут у красавіку прадалі кватэру, якая стала самай дарагой у Мінскай вобласці, піша Realt.by.
ЖК «Пірс» знаходзіцца на ўскрайку пасёлка Ратамка, проста праз дарогу ад Мінскага мора. Дабрацца сюды на машыне можна ўсяго за 10 хвілін.
У красавіку ў адным з дамоў ЖК набылі трохпакаёвую кватэру, якая ўзначаліла топ здзелак у Мінскай вобласці. Жыллё агульнай плошчай 106 квадратных метраў набылі за 430 тысяч даляраў (або 2961 даляр за квадратны метр). Дарэчы, кватэра ў «Пірсе» ў доме 2019 года пабудовы абышлася пакупніку даражэй, чым самыя дарагія дамы красавіка ва ўсіх абласцях, акрамя Мінскай.
Зараз у «Пірсе» прадаецца каля 15 кватэр.
Самы недарагі варыянт — аднапакаёвая кватэра з аздабленнем. Жыллё размешчана ў маналітным сіціхаусе на шостым паверсе. Агульная плошча кватэры з выглядам на Мінскае мора складае 33 квадратныя метры. Кватэру з мэбляй і ўбудаванай тэхнікай ацанілі на 238 тысяч рублёў, або 85 тысяч даляраў (7232 рублі, або 2576 даляраў — за метр).
Адна з самых дарагіх прапаноў — пентхаус ва ўрбан-віле. Агульная плошча гэтай кватэры складае 248 квадратных метраў. Кватэра, якая складаецца з кухні-сталовай, гасцінай і трох спальняў, прапануецца без аздаблення. Жыллё — адзінае на паверсе, з велізарнай тэрасай.
Вышыня столі — 3,5 метра. Кошт кватэры — 1,6 мільёна рублёў, або 590 тысяч даляраў (6665 рублёў, або 2374 даляры — за метр).
Каментары
Тут рэкламная кампанія перакрывае рэчаіснасць, стварае нейкую сваю. І ніхто гэта не заўважае.