Махляры пагражаюць вялікімі штрафамі за адмову ставіць вогнетушыльнікі
У Беларусі актывізаваліся тэлефонныя ашуканцы, якія прадстаўляюцца супрацоўнікамі МНС. Невядомыя тэлефануюць людзям і патрабуюць паставіць у іх жыллі вогнетушыльнікі, пагражаючы буйнымі штрафамі ў выпадку адмовы. Такім чынам злачынцы спрабуюць запалохаць чалавека і атрымаць яго асабістыя даныя, папярэджвае прэс-служба МНС.
Здымак ілюстрацыйны. Фота: pixabay.com
У МНС падкрэсліваюць, што гэта махляры.
Сапраўдныя супрацоўнікі МНС:
- не займаюцца продажам вогнетушыльнікаў, пажарных апавяшчальнікаў ці іншых сродкаў бяспекі;
- не выпісваюць штрафы па тэлефоне;
- не патрабуюць паведамляць пашпартныя даныя, нумары банкаўскіх картак або коды з SMS.
Устаноўка сродкаў пажарнай бяспекі ў прыватным доме ці кватэры носіць добраахвотны характар і робіцца дзеля асабістай бяспекі.
Людзям раяць быць уважлівымі і папярэдзіць пра такую схему сваіх блізкіх, асабліва пажылых сваякоў.
Каментары