Расіяне прыдумалі новую мутную схему, як ездзіць на люксавых аўто з беларускімі нумарамі і эканоміць грошы
У камплект з аўто уваходзіць фіктыўная фірма.
Праз шалёныя стаўкі ўтылізацыйнага збору на аўто з магутнымі рухавікамі расіяне шукаюць шляхі, як ездзіць на аўто з беларускай рэгістрацыяй. Раней мы ўжо пісалі пра тое, што некаторыя гатовыя рабіць для гэтага беларускі ДНЖ.
Але ёсць дзялкі, якія прыдумалі яшчэ адну схему, дзе расіянін, каб сэканоміць грошы, павінен стаць беларускім бізнэсменам.
У рэкламе сваіх паслуг у сацсетках адна такая расійская кампанія, якая займаецца прыгонам аўто на замову, кажа, што беларускі ўлік дае магчымасць сэканоміць каля 50% на куплі машыны. Пры гэтым яны дадаюць, што гэта нібыта абсалютна законна.
«На твой расійскі пашпарт можна адкрыць юрасобу ў Беларусі і паставіць аўтамабіль на ўлік на гэтую юрасобу», — тлумачыць мужчына на відэа і дадае, што ў адрозненне ад падобных схем з Казахстанам і Кыргызстанам ты такім чынам з'яўляешся ўласнікам аўто.
З яго слоў, каб пасля паехаць на гэтым аўто ў Расію, дастаткова толькі зрабіць страхоўку.
«Але ёсць нюанс: раз на год вы павінны выязджаць на гэтым аўто з Расіі. Але мяжы паміж краінамі няма, тады як зразумець, калі ты на ім уехаў у Расію», — адзначае мужчына.
Наколькі адрозніваюцца цэны
Кампанія праводзіць разлікі, колькі машына будзе каштаваць на расійскім, а колькі на беларускім уліку.
Так, напрыклад, BMW M3 2024 года выпуску з трохлітровым маторам на 520 к. с. з пастаноўкай на ўлік у Расіі абыдзецца прыкладна ў $140 тысяч, а калі на беларускім, то ўсяго ў $86 тысяч.
Некаторыя аўто прапануюць выключна з разлікам праз беларускую схему, бо праз вялікі аб'ём рухавіка толькі ўтыльзбор у Расіі складае $64 тысячы па цяперашнім курсе.
Амерыканскія Dodge з 6.4 пад капотам на беларускім уліку прапануюць за $41‑52 тысячы. А ў Расіі толькі ўтыльзбор на іх больш за $60 тысяч.
Як працуе схема?
Каб даведацца падрабязней пра схему, мы звязаліся з дзялкамі пад выглядам зацікаўленай асобы.
Высветлілася, што кампанія робіць усё пад ключ, таму, апроч дапамогі з адкрыццём юрыдычнай асобы на расійскі пашпарт, яны займаюцца мытнай ачысткай у Беларусі.
Пры гэтым сэканоміць прапануюць не толькі на ўтыльзборы, але і на мыце. Машыны ў Беларусі афармляюць на льготніка, каб заплаціць толькі 50% ад мыта.
Далей льготнік прадае машыну новай юрасобе, якая належыць грамадзяніну Расіі, пасля чаго аўто з'яжджае ў Расію, дзе будзе ездзіць на беларускіх нумарах.
Пры гэтым усё ж удакладняюць, што раз на год трэба будзе выезджаць з Расіі, а на ўтрыманне юрасобы ў Беларусі нібыта трэба закладаць яшчэ каля $500 на год.
У выніку атрымліваецца: перад тым, як трапіць на расійскія вуліцы, спачатку дзялкі абыходзяць заходнія санкцыі, пасля чаго выкарыстоўваюць ільготу ў Беларусі не па прызначэнні і адкрываюць фіктыўную фірму, якая будзе імітаваць дзейнасць выключна дзеля таго, каб расіянін не плаціў дзясяткі тысяч даляраў утыльзбору.
Як доўга будзе працаваць падобная схема — пытанне рытарычнае. У каментарах пад відэа многія выказваюць меркаванні, што Расія хутка падобны схематоз прыкрые, на што прадстаўнікі кампаніі адказваюць, што прынамсі пакуль тэма рабочая. І што, маўляў, лепей купіць два аўто на беларускіх нумарах, чым адно на расійскіх.
Але схему могуць прыкрыць і з беларускага боку, калі падатковая і іншыя кантралюючыя органы пачнуць высвятляць, чаму ў Беларусі з'яўляецца ўсё больш фірм, асноўная дзейнасць якіх накіравана на тое, каб набыць і паставіць на ўлік чарговы даражэзны аўтамабіль.
Каментары