Беларусы за паўгода праз зноў адкрытыя пераходы Польшчы правезлі тавараў на $17 мільёнаў, і гэта толькі праз Tax Free
Але з-за санкцый вязуць зусім не тое, што раней.
За першыя шэсць месяцаў пасля аднаўлення працы памежных пунктаў «Кузніца» («Брузгі») і «Баброўнікі» («Бераставіца») граніцу перасеклі больш за паўмільёна чалавек, аднак характар і аб'ёмы пакупак беларусаў істотна змяніліся.
Як паведамляе мытня Падляшскага ваяводства, за гэтае паўгоддзе беларусы зарэгістравалі 68 тысяч дакументаў Tax Free на агульную суму 62 мільёны злотых (каля 17 мільёнаў долараў).
Нягледзячы на вялікія лічбы, шопінг-турысты ўжо не робяць такіх буйных і дарагіх пакупак, як у мінулыя гады. Прычынай таму сталі санкцыі ЕС супраць грамадзян Беларусі і Расіі: цяпер праз польска-беларускую граніцу забаронена вывозіць велізарны пералік тавараў, што раней карысталіся попытам.
Так ужо нельга везці электроніку (смартфоны, тэлевізары, камп’ютары); будаўнічыя матэрыялы; бытавую хімію (напрыклад, пральныя парашкі) і інш.
Цяпер нашы суайчыннікі пераключыліся на базавыя прадукты і дробныя побытавыя рэчы. Часцей за ўсё ў дакументах Tax Free фігуруюць кава і гарбата; адзенне і цацкі; дробная бытавая тэхніка і аксесуары (брытвы, мяшкі для пыласосаў і г.д.).
Пункты пропуску «Баброўнікі» і «Кузніца» былі закрытыя на працягу некалькіх гадоў. Польскі бок прыняў рашэнне адкрыць іх 17 лістапада мінулага года, каб ажывіць эканоміку прыгранічнага Падляшскага рэгіёна, які моцна пакутаваў без турыстаў. Рух на граніцы расце, але ў польскага боку былі чаканні большага фінансавага выніку.
35 маладых беларусаў і беларусак, за якімі варта сачыць: апублікаваны першы спіс Next 3532
Каментары