З дронамі і нейрасеткамі. У Нідэрландах тэстуюць лагер для 2000 расійскіх ваеннапалонных на выпадак вайны
Армія Нідэрландаў упершыню за больш чым 30 гадоў адпрацоўвае стварэнне лагера для ваеннапалонных. На гэтым тыдні на палігоне Марнехёйзен у правінцыі Гронінген тэстуюць праект лагера, які ў выпадку вайны зможа прыняць да 2000 ваеннаслужачых. Вучэнні звязаныя з падрыхтоўкай да магчымага канфлікта з Расіяй, піша The Moscow Times.
Сам лагер можна будзе разгарнуць за тыдзень. Да будаўніцтва такіх аб’ектаў плануецца прыцягваць не толькі вайскоўцаў, але і грамадзянскіх падрадчыкаў, якія звычайна ўзводзяць інфраструктуру для найбуйнейшых музычных фестываляў.
Ён не будзе нагадваць традыцыйныя лагеры ваеннапалонных мінулага з шматлікімі вышкамі і пражэктарамі. Бяспеку забяспечаць сучасныя сістэмы назірання. Камеры змогуць рэагаваць на рух і гук, над тэрыторыяй будуць лётаць беспілотнікі і перадаваць відэа ў рэжыме рэальнага часу.
Ваеннапалонных плануецца размяшчаць у невялікіх белых бараках з двух’яруснымі ложкамі.
Афіцэры і радавыя будуць жыць разам, не больш за 20 чалавек у адным памяшканні. Для іх прадугледжаны прагулачныя зоны, агульныя душавыя, сталовая і медпункт. Мабільныя тэлефоны і асабістыя электронныя прылады будуць канфіскоўвацца, але ім дазволяць пісаць лісты сваякам.
«Яны могуць разлічваць на ўмовы пражывання як мінімум не горшыя за тыя, у якіх знаходзяцца нашы ўласныя ваеннаслужачыя», — заявіла генерал і камандуючы Камандаваннем аператыўнай падтрымкі сухапутных войскаў Нідэрландаў Ніколь дэ Вольф.
У апошні раз падобныя вучэнні праводзіліся яшчэ ў часы халоднай вайны. Паводле слоў дэ Вольф, за апошнія дзесяцігоддзі армія практычна страціла вопыт ва ўтрыманні тысяч палонных. Падчас місій у Афганістане нідэрландскім вайскоўцам даводзілася затрымліваць толькі па два-тры чалавекі, якіх можна было ўтрымліваць на вайсковых базах.
«Калі вы раззброілі праціўніка, то хочаце як мага хутчэй прыбраць яго далей ад лініі фронту», — кажа дэ Вольф. Захопленых ваеннаслужачых будуць перавозіць на сотні кіламетраў у тыл. Там іх зарэгіструюць, дапытаюць і будуць утрымліваць да магчымага абмену на палонных нідэрландцаў.
Вайскоўцы кажуць, што гуманнае абыходжанне з палоннымі прадыктавана не толькі патрабаваннямі міжнароднага права. «Не рабі іншым таго, чаго не жадаеш сабе», — кажа дэ Вольф.
Паводле яе слоў, Нідэрланды разлічваюць, што ў выпадку трапляння іх ваеннаслужачых у палон, да іх таксама будуць ставіцца па-чалавечы.
Цяпер чытаюць
«Рэтранслятары выключыць, зняць і паказаць нам, што яны знятыя». Зяленскі патлумачыў, чаму паставіў ультыматум і што мае зрабіць Мінск27
Каментары