Значную частку Еўропы накрыла моцная спякота. У шэрагу краін тэмпература паветра наблізілася да 40 градусаў, што прымусіла ўлады абвясціць павышаныя ўзроўні небяспекі і прыняць дадатковыя меры бяспекі, піша Reuters.
Асабліва складаная сітуацыя склалася ў Італіі, дзе пасля некалькіх дзён гарачыні больш за 35 градусаў чырвоны ўзровень небяспекі быў абвешчаны ў некалькіх буйных гарадах, у тым ліку ў Балонні, Фларэнцыі, Мілане і Турыне. У Рыме людзі ратаваліся ад сонца пад парасонамі нават падчас традыцыйнай нядзельнай малітвы Папы.
У Іспаніі сіноптыкі таксама выпусцілі чырвоныя і аранжавыя папярэджанні. У многіх рэгіёнах краіны і на востраве Маёрка тэмпература перавышае 39—40 градусаў. Паводле прагнозаў, спякота захаваецца яшчэ некалькі дзён.
У Германіі тэмпература месцамі дасягнула 38 градусаў. Адначасова метэаролагі папярэдзілі пра моцныя навальніцы на ўсходзе краіны. У Берліне з-за залеў нават перапынялі правядзенне музычнага фестывалю пад адкрытым небам.
Прычынай анамальнай спякоты стала гарачае паветра з пустыні Сахара, якое рухаецца на поўнач пад уплывам магутнага антыцыклону. Метэаролагі адзначаюць, што так званы «цеплавы купал» затрымлівае гарачае паветра над Заходняй і Цэнтральнай Еўропай, што прыводзіць да далейшага росту тэмпературы.
Ад спякоты цярпяць не толькі людзі, але і жывёлы. У Бельгіі ў цэнтры дапамогі дзікай прыродзе паведамляюць пра вялікую колькасць птушак і іншых жывёл з прыкметамі цеплавога стрэсу. Некаторыя птушаняты нават пакідаюць гнёзды раней часу, каб выратавацца ад перагрэву.
Эксперты адзначаюць, што праз змяненне клімату хвалі экстрэмальнай спякоты ў Еўропе становяцца ўсё больш частымі і інтэнсіўнымі.
Зяленскі: Рэтранслятары на мяжы Беларусі прыпынілі працу69
Каментары