Арабскага рускамоўнага блогера нібыта хацелі забіць у Беларусі два браты-шыіты

Як паведамляецца ў тэксце, у якім Ібрагім Муса згадваецца ў трэцяй асобе, двое мужчын ліванскага паходжання нібыта спрабавалі атруціць кальян, які прызначаўся для Ібрагіма. Паводле гэтай версіі, ён зрабіў толькі невялікую зацяжку, але заўважыў нешта падазронае і адмовіўся працягваць. Сястра гаспадара дома, заўважыўшы, што з кальяна нешта выцякае, забрала яго.

Далей аўтар паста сцвярджае, што адзін з нападнікаў нібыта спрабаваў стрэліць у Ібрагіма з блізкай адлегласці, але прамахнуўся. Пасля гэтага аўтар тэксту пераследаваў яго і затрымаў да прыезду іншых людзей і міліцыі. Другога падазраванага, паводле апісання, удалося выявіць па запісах камер назірання, пасля чаго абодвух затрымалі.

У паведамленні гаворыцца, што супраць мужчын можа быць распачатая крымінальная справа за спробу забойства. 

Паводле версіі аўтара, прычынай нападу сталі палітычныя погляды Ібрагіма Мусы і яго крытычныя выказванні на адрас Ірана і былога кіраўніцтва краіны. Сцвярджаецца, што падазраваныя некалькі гадоў сачылі за яго дзейнасцю і негатыўна ставіліся да яго публічных поглядаў. Таксама аўтар сцвярджае, што ў іх нібыта быў закрыты радыкальны шыіцкі чат, дзе ўдзельнічала каля дзесяці чалавек.

У тэксце падрабязна апісваецца паходжанне затрыманых. Паводле гэтых звестак, гэта два браты-шыіты ліванскага паходжання, якія нарадзіліся і ўсё жыццё жылі ў Беларусі. Іх маці нібыта беларуска, а з Ліванам яны мелі мала сувязяў. Паводле аўтара, яны амаль не ведалі арабскай мовы, вялі закрыты лад жыцця і атрымлівалі палітычную інфармацыю пераважна з рускамоўных тэлеграм-каналаў.

Аўтар робіць выснову, што гэты выпадак не варта разглядаць як характарыстыку ўсёй шыіцкай супольнасці Лівана. Паводле яго меркавання, гаворка ідзе пра асобных людзей, якія маглі трапіць пад уплыў радыкальных ідэяў праз інтэрнэт-супольнасці.

Ібрагім Муса нарадзіўся ў 2002 годзе ў Кіркуку на поўначы Ірака. Ягоны бацька быў дыпламатам і ў 2002—2003 гадах, у апошні перыяд кіравання Садама Хусэйна, працаваў у пасольстве Ірака ў Расіі. Вышэйшую адукацыю ён атрымаў у Маскве па спецыяльнасці «міжнародныя адносіны».

Муса стварыў рускамоўны тэлеграм-канал «Голос арабов». Паводле яго слоў, пазней гэты канал быў скрадзены махлярамі. У новым сваім канале ён публікуе матэрыялы пра арабскі свет з пазіцый арабскага нацыяналізму і панарабізму. Таксама ён крытычна выказваецца пра палітыку іранскага рэжыму.

МУС і Следчы камітэт пакуль што афіцыйна пра выпадкі стральбы ў Мінску ў апошнія дні не паведамлялі.

• 0
• 1
• 3
• 2
• 3
• 0
• 0
• 0