Беларускі рэжысёр Яўген Карняг ставіць у Маскве спектакль пра апошнія дні ў бункеры Гітлера
Маскоўскі яўрэйскі тэатр «Шалом» абвясціў планы на сезон 2026-2027, сярод прэм’ер — спектакль галоўнага рэжысёра беларускага тэатра лялек Яўгена Карняга, піша Reform.news.
Першыя паказы спектакля Карняга «Магда» па п’есе брытанскага драматурга Майкла Ардыці пройдуць 12 і 13 верасня. Дзеянне спектакля адбываецца ў берлінскім бункеры Гітлера 22 красавіка 1945 года. У аснове сюжэта — сустрэча Евы Браўн, каханкі Гітлера, і Магды Гебельс, жонкі міністра прапаганды Ёзэфа Гебельса. Праз вобразы людзей, якія апынуліся побач з уладай, робіцца спроба даследаваць працэс ператварэння культурнай і гуманістычнай Германіі ў нацысцкую дзяржаву, кіраваную гвалтам.
«Бункер нібы сабраў міні-мадэль германскага грамадства таго часу: тут і наіўныя людзі, якія нічога не хацелі ведаць пра зверствы нацызму, і прадстаўнікі народа, «ад зямлі», якія шчыра падтрымліваюць Гітлера, і фанатык, і інтэлігент, і ідэолаг, і «будучыня нацыі» — дзеці, якія вераць, што іх бацькі і дзядзька фюрэр — «самыя лепшыя людзі на планеце», — паведамляе анатацыя.
«Як атрымалася, што выдатная Германія — радзіма Шылера, Гётэ, Дзюрэра, Мана, Рэмарка, Брэхта і сотняў іншых вялікіх гуманістаў — ператварылася ў нацысцкую дзяржаву, якая спальвае людзей і знішчае свабоду? Хто адкажа за мільёны знішчаных жыццяў і разбураных дамоў? Хто атрымае пакаранне, і ці ёсць яно?» — над гэтымі пытаннямі прапануюць задумацца гледачу.
Жанр новай пастаноўкі Карняг вызначыў як «калыханку, якая пераходзіць у хорар».
Разам з рэжысёрам над прэм’ерай працуюць мастачка Таццяна Нерсісян, мастак па святле Мікалай Суркоў і кампазітарка Кацярына Аверкава.
Для Яўгена Карняга гэта першая праца на сцэне «Шалома».
Театр «Шалом» быў заснаваны ў 1988 годзе як першы і адзіны ў Расіі прафесійны яўрэйскі тэатр. За гады працы зарэкамендаваў сябе як эксперыментальная пляцоўка, дзе ставяць спектаклі на вострыя сацыяльныя і культурныя тэмы. «Шалом» прыцягвае гледачоў не толькі яўрэйскімі пастаноўкамі, але і праектамі, прысвечанымі агульначалавечым каштоўнасцям. Тэатр актыўна супрацоўнічае з рэжысёрамі і драматургамі, якія працуюць у жанры сацыяльнага тэатра.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж21
Каментары
Ну, колькі можна на адны і тыя ж граблі. Спектакль забаронюць, артыстаў, габрэяў, пасодзуць, рэжысёра "растраляюць", а народ гэтых "ворагаў народу" асудзіць.
Асабіста у мяне ніякага сумнення ў такім сцэнары гэтага спектакля няма.