На таргі трапіла стогадовая сядзіба з калонамі і паркам. Яе нават не трэба аднаўляць
У маляўнічым мястэчку ў Гродзенскай вобласці прадаецца сядзіба мінулага стагоддзя. Пры гэтым, у адрозненне ад большасці падобных пабудоў, дом не мае патрэбы ў глабальным рамонце. Апошнія гады тут размяшчаўся гатэль і адпачывалі турысты. Цяпер для комплексу шукаюць новых гаспадароў. Таргі за дом з вялікім участкам пройдуць на пляцоўцы «БУТБ-Маёмасць», піша Realt.by.
База адпачынку размясцілася на ўскраіне горада Масты, на вуліцы Янкі Купалы, 62. Непадалёк знаходзіцца чыгуначная станцыя. Адлегласць да Мінска — каля 240 кіламетраў, адлегласць да Гродна — 60 кіламетраў.
Каменны дом з мансардай, класічным фасадам і калонамі пабудавалі ў 1920‑я гады ў папулярным тады закапанскім стылі. Навокал маёнтка заклалі сад і пасадзілі невялікі акуратны парк, фрагменты якога часткова пазнаюцца і сёння.
Пасля далучэння Заходняй Беларусі да СССР у будынку адкрылася сярэдняя школа, а ўжо ў нашы дні тут размясцілася аграсядзіба «Явар» з банкетнай залай. Яна працавала пад кіраўніцтвам мясцовага ЖКГ.
Агульная плошча цаглянага будынка налічвае каля 270 квадратных метраў. Акрамя аграсядзібы, у склад лота ўваходзяць дзве майстэрні, альтанка, калодзеж і ўласны тэнісны корт. У комплексе ўжо ёсць усе камунікацыі — электразабеспячэнне, водаправодная сетка і аўтаномная каналізацыя.
Сядзіба займае зямельны надзел плошчай каля 1,7 га. Новы ўласнік атрымае гэту зямлю ў арэнду на 50 гадоў. Комплекс знаходзіцца трохі ўбаку ад горада, у спакойным месцы. У саміх Мастах працякае рака Нёман, а летась тут пасля рэканструкцыі адкрылі самы доўгі ў краіне падвесны пешаходны мост са шклянымі ўстаўкамі.
Пачатковы кошт сядзібы складае 345 тысяч рублёў (120 тысяч даляраў па курсе Нацыянальнага банка). Таргі пройдуць у электронным выглядзе на пляцоўцы «БУТБ-Маёмасць». Яны прызначаныя на 25 жніўня.
У Мінкульце расказалі, якія палацы і сядзібы будуць аднаўляць найбліжэйшым часам
Сядзібу «Малыя Дольцы» на Ушаччыне зноў выставілі на аўкцыён. Толькі паўгода таму яе нібыта набыў расіянін
Замест металадахоўкі — дубовая драніца. У цэнтры Віцебска на месцы міліцыі адкрылася кавярня ў бездакорна адноўленым 200‑гадовым будынку
Мара каля возера Нарач. Як сям'я з Мінска ператварае стогадовую хату ў аграсядзібу
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары