Жыллё ў цэнтры Прагі даражэйшае, чым у Мадрыдзе і Берліне, а ў цэнтры Варшавы — даражэйшае, чым у Бруселі.
Якія краіны і гарады Еўропы цяпер самыя дарагія для куплі дома або кватэры?
Даклад Mapping the World’s Prices 2026, падрыхтаваны даследчым інстытутам Deutsche Bank, параўноўвае кошт квадратнага метра пры куплі кватэры ў цэнтры горада ў 69 мегаполісах, з іх 28 — у Еўропе, піша «Еўраньюс».
Швейцарыя — самая дарагая краіна для куплі жылля
Два швейцарскія гарады ўзначальваюць рэйтынг, робячы Швейцарыю самай дарагой краінай для куплі нерухомасці ў гарадскіх цэнтрах. Цана квадратнага метра кватэры складае 22 910 € у Цюрыху і 19 439 € у Жэневе.
За кватэру плошчай 80 м² гэта азначае прыблізна 1 833 000 € у Цюрыху і 1 555 000 € у Жэневе.
Лондан займае трэці радок — 17 241 € за квадратны метр. Кватэра такой плошчы абыдзецца прыкладна ў 1 379 000 €.
Лондан на 35 % даражэйшы за Парыж
Парыж ідзе далей — квадратны метр тут каштуе 12 771 €. Купля кватэры ў цэнтры Лондана прыкладна на 35 % даражэйшая, чым у Парыжы.
Пяцёрку лідараў замыкае Вена, дзе квадратны метр каштуе 12 483 €.
Самы дарагі горад Германіі — Мюнхен, дзе квадратны метр каштуе 11 435 €.
Люксембург (11 011 €), Капенгаген (10 191 €), Стакгольм (10 037 €) і Осла (9 785 €) таксама ўваходзяць у дзясятку самых дарагіх. У сталіцы Нарвегіі цана апускаецца ніжэй за адзнаку 10 000 €.
Тры паўночныя сталіцы ўваходзяць у топ-10, тады як Хельсінкі займае 13‑е месца з 8 431 € за квадратны метр.
Мілан і Амстэрдам трохі апярэджваюць фінскую сталіцу: 9 378 і 9 273 € за квадратны метр адпаведна.
Прага даражэйшая за Мадрыд і Берлін
Прага абыходзіцца даражэй, чым сталіцы Іспаніі і Германіі. Цана квадратнага метра пры куплі кватэры ў цэнтры горада — 8 352 €.
Для параўнання: у Мадрыдзе квадратны метр каштуе 7 831 €, а ў Берліне — 7 613 €. Рым ідзе за імі з паказчыкам 7 328 € за квадратны метр.
Вышэй за адзнаку 7 000 € застаюцца Дублін (7 185 €) і Франкфурт (7 162 €), а ў Лісабоне (6 636 €) і Барселоне (6 485 €) цана трымаецца вышэй за 6 000 €.
Самыя танныя гарады — Стамбул і Афіны
Стамбул — самы танны еўрапейскі горад у спісе: 2 646 € за квадратны метр, за ім ідзе сталіца Грэцыі, Афіны, з паказчыкам 3 442 €.
Сталіца ЕС Брусель таксама ўваходзіць у лік самых танных гарадоў, займаючы трэці радок знізу. Квадратны метр кватэры там каштуе 4 380 €.
Бірмінгем у Вялікабрытаніі (4 671 €) таксама ніжэйшы за адзнаку 5 000 €, тады як Будапешт (5 243 €), Варшава (5 443 €) і Эдынбург (5 708 €) ужо вышэйшыя за гэты ўзровень.
Ганконг — самы дарагі, Каір — самы танны
Сярод усіх 69 гарадоў, якія ўвайшлі ў даклад, самым дарагім застаецца Ганконг — 23 790 € за квадратны метр, за ім ідуць Цюрых (22 910 €) і Сеул (21 897 €).
Найтаннейшымі гарадамі з'яўляюцца Каір (784 €) і Ёханесбург (913 €), абодва ніжэй за адзнаку 1 000 €.
Прыведзеныя ў дакладзе даныя заснаваныя на статыстыцы Numbeo і Deutsche Bank.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары