Эканамічны суд Мінска 22 верасня распачаў працэдуру банкруцтва ТАА «Колабайк» — юрыдычнай асобы, якая стаяла за некалі папулярным сэрвісам велашэрынгу Kolobike, піша Office Life.
Заяву ў суд падаў ліквідатар кампаніі. Агульная сума крэдыторскай запазычанасці «Колабайка» складае 4,4 мільёна рублёў, у той час як кошт усіх актываў, якія засталіся ў кампаніі, ацэньваецца ўсяго ў 9875 рублёў.
Паколькі маёмасці кампаніі відавочна недастаткова для пагашэння даўгоў, суд пастанавіў адкрыць у дачыненні да яе конкурсную вытворчасць. Вынікі працэдуры плануецца разгледзець на судовым пасяджэнні 14 студзеня 2027 года.
Паводле судовага вызначэння, цяпер адзіным удзельнікам ТАА «Колабайк» з'яўляецца Павел Снапкоў. Першапачаткова праект належаў бізнэсменам Вадзіму Асіпчыку і Валерыю Шамрылаву.
У канцы 2025 года стала вядома, што Kolobike распрадаваў свае ровары. У кампаніі тады тлумачылі гэта магчымай рэарганізацыяй або закрыццём сэрвісу.
Прадстаўнік кампаніі адзначаў, што рынак сэрвісаў шэрынгу істотна змяніўся з 2019 года, калі Kolobike пачаў працаваць. Паступова электрасамакаты сталі выцясняць ровары, і ў выніку за апошні сезон фінансавыя паказчыкі «Колабайка» значна пагоршыліся.
Цяпер чытаюць
Таксістка з Таджыкістана насмерць збіла беларуску ў Польшчы — і спакойна пакінула краіну7
Каментары