Партыя Флавіу Балсанару афіцыйна прызнала ягоную паразу на выбарах прэзідэнта Бразіліі
Ліберальная партыя кандыдата ў прэзідэнты Бразіліі Флавіу Балсанару афіцыйна прызнала вынікі другога тура выбараў, у якім перамог дзейны 81‑гадовы прэзідэнт Луіс Інасіу Лула да Сілва.
Паводле даных Найвышэйшага выбарчага суда, Лула набраў 51,8 працэнта галасоў і забяспечыў сабе чацвёрты прэзідэнцкі тэрмін, у той час як Балсанару атрымаў 48,2 працэнта. Агульны адрыў склаў амаль 4,4 мільёна галасоў.
У партыі Балсанару лічаць, што на такі вынік паўплывала ўрадавая праграма пашырэння сацыяльных выплат малазабяспечаным сем'ям падчас выбарчай кампаніі, што, на іх думку, парушыла справядлівасць выбарчага працэсу.
Сам Флавіу Балсанару адмовіўся прызнаць паражэнне. Ён даволі нечакана перамог у першым туры і лідзіраваў у апытаннях перад другім турам. Балсанару абвясціў у сваім інстаграме пра намер звярнуцца ў суд, каб ануляваць вынікі выбараў і прызнаць кандыдатуру Лулы несапраўднай праз злоўжыванне эканамічнай і палітычнай уладай. Пры гэтым палітык падкрэсліў, што збіраецца ўзначаліць апазіцыю новаму ўраду.
Адначасова з выбарчымі спрэчкамі бразільская паліцыя вядзе расследаванне супраць Балсанару па падазрэнні ў карупцыі і адмыванні грошай, звязаных з фінансаваннем фільма пра яго бацьку, былога прэзідэнта Жаіра Балсанару. Патрабаванне здаць пашпарт і забарона на выезд з краіны былі ініцыяваныя Вярхоўным судом пасля заявы яго брата Эдуарду Балсанару, які жыве ў ЗША і публічна параіў Флавіу з'ехаць з Бразіліі ў выпадку паражэння. Сам палітык назваў гэтую справу фарсам, але запэўніў, што пашпарт здасць і ўцякаць з краіны не збіраецца.
Сумневы ў сумленнасці выбараў падтрымаў і прэзідэнт ЗША Дональд Трамп, які назваў выбарчы працэс у Бразіліі крайне карумпаваным і сфальсіфікаваным. Трамп раней прымаў Флавіу Балсанару ў Белым доме, а таксама падтрымліваў яго бацьку Жаіра Балсанару, які кіраваў Бразіліяй да пачатку 2023 года і пазней быў асуджаны да працяглага турэмнага тэрміну за спробу дзяржаўнага перавароту.
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6262
Каментары