Chronika

U Kazulina skanfiskavali piśmo Milinkieviču

U staršyni BSDP (H) Alaksandra Kazulina 27 kastryčnika padčas mytnaha nadhladu ŭ Nacyjanalnym aeraporcie «Miensk» byli skanfiskavany materyjały, jakija palityk nazvaŭ partyjnaj pierapiskaj. U vyniku doŭhaha składańnia pratakołu Kazulin, jaki lacieŭ na źjezd švedzkich sacyjał-demakrataŭ, spaźniŭsia ŭ samalot. Palityk źbirajecca padavać zajavu ŭ sud za źniavahu maralnaj i dziełavoj reputacyi.

Punktam numar 1 u śpisie skanfiskavanych rečaŭ staić «Piśmo A.Kozulina Milinkieviču A.V. ot 19 kastryčnika 2005 h.». Fatakopiju dakumentu nadrukavała «Narodnaja vola».

KDB maje pytańni da dziaŭčat

Adździeł pašpartna-vizavaj słužby Kastryčnickaha rajonu Miensku 28 kastryčnika nia daŭ dazvoł na vyjezd kaardynatarcy pravaabrončaha adździełu niezarehistravanaj arhanizacyi «Zubr» Irynie Toŭścik. Rastłumačyli tym, što ŭ KDB da jaje «ŭźnikli pytańni».

Mienskaja haradzkaja kalehija advakataŭ 28 kastryčnika admoviła pravaabaroncy Viery Stramkoŭskaj u adpačynku za svoj košt. Spn.Stramkoŭskaja miełasia jechać u Tbilisi na mižnarodnuju kanferencyju ABSE ŭ pytańniach niezaležnaści advakatury.

Voś vam sumlennyja vybary

Milicyjanty 29 kastryčnika spynili ŭstanoŭčy źjezd niezarehistravanaha hramadzkaha abjadnańnia «Partnerstva» ŭ mienskim kinateatry «Centralny», abvinavaciŭšy ŭ praviadzieńni niesankcyjanavanaha schodu; kala 70 aktyvistaŭ trapili ŭ adździaleńnie milicyi. Paśla piśmovych tłumačeńniaŭ kala 60 čałaviek adpuścili. U specpryjomnik trapili lider arhanizacyi Mikałaj Astrejka, jahonyja namieśniki Enira Branickaja j Alaksandar Bondaraŭ. 31 kastryčnika Astrejka, Bondaraŭ i Branickaja atrymali pa 15 sutak aryštu, Śviatłanu Konavu asudzili na 30 bazavych vieličyń (870 tys. rub.). Meta «Partnerstva» — nazirańnie za vybarami, kab jany byli sumlennymi.

List pratestanckich japiskapaŭ

Japiskapy pratestanckich sajuzaŭ i abjadnańniaŭ (piacidziasiatnikaŭ, baptystaŭ i poŭnaevanhielcaŭ) napisali 28 kastryčnika adkryty zvarot kiraŭniku Administracyi prezydenta Viktaru Šejmanu, premjer-ministru Siarhieju Sidorskamu i staršyni Mienharvykankamu Michaiłu Paŭłavu: jany prosiać spynić pieraśled pratestanckaj carkvy «Novaje žyćcio».

Aby prydziercisia

26 kastryčnika Vyšejšy haspadarčy sud pakinuŭ u sile papiaredžańnie Ministerstva infarmacyi redakcyi hazety «Biełorusy i rynok» u častcy, jakaja tyčyłasia nazvy vydańnia. Takim čynam, vydańnie pakul nia zmoža vykarystoŭvać u lahatypie abrevijaturu «BR», jakaja vykarystoŭvałasia ciaham dvuch hod.

Palakaŭ ciahajuć

U Ščučyn 26 kastryčnika na dopyt vyklikali žurnalistaŭ Andreja Pačobuta i Andžeja Pisalnika, a taksama namieśnikaŭ staršyni SPB Juzafa Pažeckaha i Viesłava Kieŭlaka.

28 kastryčnika Haradzienskaja abłasnaja prakuratura skasavała padpisku ab niavyjeździe žurnalistu A.Pačobutu, adnak vyjechać za miažu jon nia moža: žurnalistu anulavali dazvolny štamp u pašparcie.

Kiraŭnicu SPB Anžaliku Borys 28 kastryčnika siem hadzin trymali na pamiežnym pierachodzie «Bierastavica—Babroŭniki».

Labiedźku zatrymali

27 kastryčnika ŭ aeraporcie «Miensk-2» zatrymali lidera AHP Anatola Labiedźku, jaki viartaŭsia sa Strasburhu z sustrečy z kiraŭnictvam Eŭraźviazu. Pamiežniki j mytniki z supracoŭnikami KDB pratrymali jaho ŭ aeraporcie paŭtary hadziny, a paśla pilnaha nadhladu kanfiskavali pracoŭnyja materyjały palityka.

Zatrymańni aktyvistaŭ

25 kastryčnika aktyvistki arhanizacyi «Zubr» Alena Kopač i Natalla Vuško byli zatrymany ŭ Miensku milicyjantami za raspaŭsiud ulotak.

25 kastryčnika supracoŭniki UUS Centralnaha rajonu zatrymali siabroŭ moładzievaj frakcyi BNF Paŭła Batujeva i Alesia Mazanika za raspaŭsiud «Narodnaj voli». Milicyjanty pierapisali ich pašpartnyja źviestki i adpuścili.

27 kastryčnika zatrymali «zubroŭca» Michasia Ismaiłava z ulotkami, pryśviečanymi Dniu salidarnaści 16 listapada.

U Viciebsku

Sudździa Čyhunačnaha rajonnaha sudu Viciebsku Jury Urban prysudziŭ 25 kastyčnika aktyvistu KCHP-BNF Uładzimieru Pleščanku štraf u 29 000 rub. za «drobnaje chulihanstva». Milicyjanty abvinavacili jaho ŭ abrazie prachožych na tym miescy, dzie U.Pleščanka zvyčajna raspaŭsiudžvaŭ partyjny biuleteń «Biełaruskaja salidarnaść». Adzinym śviedkam chulihanstva byŭ supracoŭnik milicyi, jaki i zatrymaŭ aktyvista.

29 kastryčnika stała viadoma, što viciebskuju arhanizacyju PBNF pazbaŭlajuć ofisu i jurydyčnaha adrasu. Novaje pamiaškańnie šukaje taksama niedziaržaŭnaja hazeta «Vitiebskij kuŕjer».

Siarhiej Budkin, Arkadź Šanski

• 0
• 0
• 0
• 0
• 0
• 0
• 0
• 0