Ekśpierty AAN: Chimičnaja ataka ŭ Damasku była, na rakietach nadpisy na kirylicy
Z dakłada mižnarodnych ekśpiertaŭ vynikaje, što pad Damaskam mieła miesca złačynstva suprać čałaviečnaści.
Dakład AAN razasłany krainam-udzielnicam arhanizacyi. Žurnalisty pakul pabačyli tolki pieršuju jaho staronku — i to na zdymku. Jany praanalizavali fatahrafiju, na jakoj kiraŭnik hrupy ekśpiertaŭ AAN u Siryi Okie Sełstrem pieradaje tekst dakłada hienieralnamu sakrataru arhanizacyi Pan Hi Munu.
Adnak pabačanaje dazvalaje ź vialikaj dolaj imaviernaści skazać pra źmiest dakumienta.
Na pieršaj staroncy dakłada pa vynikach rasśledavańnia padziej pad Damaskam 21 žniŭnia havorycca, što znojdzienyja «pierakanaŭčyja dokazy» vykarystańnia bajavoha atrutnaha hazu zaryn. Pavodle dadzienych ekśpiertaŭ, śmiertanosnyja zarady byli dastaŭleny z dapamohaj rakiet kłasa «ziamla — ziamla».
Na frahmientach niekatorych vykarystanych rakiet jość nadpisy na kirylicy, raspaviała krynica telekanała CNN, spasyłajučysia na dakład.
Ekśpierty AAN apytali bolš za 50 vidavočcaŭ i miedykaŭ, vyznačyli simptomy, ź jakimi pakutavali i pamirali paciarpiełyja, sabrali ŭzory vałasoŭ, mačy i kryvi. Jany praviali ahlad budynkaŭ i vajennaj amunicyi i ŭziali 30 probaŭ navakolnaha asiarodździa.
Pavodle źviestak ekśpiertaŭ, «sabranyja ekałahičnyja, chimičnyja i miedycynskija proby demanstrujuć jasnyja i pierakanaŭčyja dokazy taho, što rakiety kłasa „ziamla — ziamla“, jakija źmiaščajuć haz niervova-paralityčnaha dziejańnia zaryn, byli vykarystanyja… u rajonie Huta pad Damaskam… My pryjšli da vysnovy, što chimičnaja zbroja była vykarystana… suprać mirnych ludziej, u tym liku dziaciej, u adnosna vialikich maštabach», — cytuje Asašyejted pres pieršuju staronku dakłada.
Dypłamatyčnyja krynicy paviedamili amierykanskamu telekanału CNN, što ŭ dakładzie detalova razabranyja «prykmiety vinavataści» ŭ atacy 21 žniŭnia. Havorycca, što adkaznyja za ataku mieli ŭ svaim rasparadžeńni nie mienš za 350 litraŭ zarynu. Pa słovach dypłamatyčnaj krynicy, dakład inśpiektaraŭ taksama apisvaje «trajektoryi rakiet», jakija ŭzarvalisia ŭ pryharadach Damaska — prynamsi, dźvie trajektoryi ŭdałosia ź vialikaj dolaj imaviernaści vyznačyć pa charaktary razbureńniaŭ i varonkach u miescy ich padzieńnia.
Usiaho inśpiektary pabyvali na miescy padzieńnia piaci rakiet z zarynam. Ale damova ab spynieńni ahniu dała im tolki niekalki hadzin na aznajamleńnie ź miescami padzieńnia rakiet. Havorycca, što byli identyfikavanyja 140-milimietrovyja snarady ad sistemy załpavaha ahniu BM-14 i 330-milimietrovyja niekiravanyja reaktyŭnyja snarady. Pieršyja raniej byli na ŭzbrajeńni ŭ siryjskaj armii, jość madyfikacyja snaradaŭ da ich z chimičnym zaradam.
Ekśpierty znajšli ślady zarynu na sabranych frahmientach hetych snaradaŭ.
Nahadajem, što ŭ śfieru kampietencyi inśpiektaraŭ AAN ŭvachodziŭ dokaz abo abviaržeńnie samoha fakta prymianieńnia bajavych atrutnych rečyvaŭ. Chto stajaŭ za atakaj, inśpiektary skazać nie ŭpaŭnavažanyja.
Adnak ekśpierty ŭ svaim dakładzie prychodziać da vysnovy, što za atakaj, ź vialikaj dola imaviernaści, stajali prafiesijanały. Rakiety byli vypuščanyja ŭ časie pamiž 2.00 i 5.00 nočy. U hetym pramiežku ŭ hetuju noč viecier najmienšy, tempieratura pavietra apuskajecca, i ŭ vyniku hetaha najbolšyja šancy, što atrutnyja hazy buduć ścialicca pa ziamli. «Užyćcio chimičnaj zbroi ŭ takich mietearałahičnych umovach pavialičvaje jaje patencyjny efiekt, bo ciažkija hazy źbirajucca kala ziamli, pranikajuć u nižnija ŭzroŭni budynkaŭ, dzie znajšli prytułak ludzi», — havorycca ŭ dakładzie.
Ekśpierty-chimiki taksama vyjavili, što jakaść zarynu była pramysłovaj, našmat lepšaj, čym toj, jaki ŭžyvaŭsia Irakam u časie irana-irackaj vajny abo pry terakcie ŭ takijskim mietro ŭ siaredzinie 90-ch.
Hrupa ekśpiertaŭ AAN u kolkaści 13 čałaviek na čale sa šviedskim prafiesaram Okie Sełstremam prybyła ŭ Siryju za niekalki dzion da ataki z metaj daśledavać fakty ŭžyćcia chimičnaj zbroi ŭ Alepa. Jana składałasia z chimikaŭ i inšych śpiecyjalistaŭ z roznych krain. Adnak paśla 21 žniŭnia ekśpiertaŭ nakiravali ŭ pryharady Damaska. Skončyli zbor roznych prob inśpiektary ŭ kancy žniŭnia.
ZŠA, Vialikabrytanija i Francyja nieŭzabavie paśla paviedamleńniaŭ ab tym, što zdaryłasia, zajavili, što za chimičnaj atakaj stajali siryjskija ŭradavyja vojski, a paŭstancy takoj zbroi nie majuć. U svaju čarhu, Damask i Maskva abvinavacili ŭ vykarystańni bajavych atrutnych rečyvaŭ apazicyju. Siryjskija ŭłady admaŭlajuć svajo dačynieńnie da incydentu.
Jak možna mierkavać, dakład pryvodzić da vysnovy, što ŭsio ž za ciažkim złačynstvam stajali siły siryjskaha dyktatara Bašara Asada.
Vysnovy inśpiektaraŭ AAN mohuć dyskredytavać pazicyi Rasii, jakaja da apošniaha baraniła Asada i pastaŭlała jamu zbroju. Ciažka ŭjavić sabie, kab chtości inšy, a nie ŭradavyja vojski, mieŭ dostup da takich abjomaŭ zarynu, adznačaje Bi-Bi-Si.
Pan Hi Mun, aznajomiŭšysia z dakładam, nahadaŭ, što luboje ŭžyćcio chimičnaj zbroi, lubym bokam — heta złačynstva.
Jak možna čakać, novyja detali dakłada stanuć viadomyja siońnia ŭdzień.
Kamientary